Painters ipipinta ang ika-5 sunod na panalo
MANILA, Philippines — Ang Rain or Shine na siguro ang koponang may pinakamaraming laro simula noong Enero 26.
Ngunit walang reklamo si coach Caloy Garcia.
“We just have to make the best out of it,” wika ni Garcia. “We must stick together as a team and we must continue playing hard.”
Target ang pang-limang sunod na panalo para patuloy na solohin ang liderato, lalabanan ng Elasto Painters ang Magnolia Hotshots ngayong alas-7 ng gabi matapos ang labanan ng Alaska Aces at Blackwater Elite sa alas-4:30 ng hapon sa 2019 PBA Philippine Cup sa MOA Arena sa Pasay City.
Matapos yumukod sa Blackwater, 99-111, noong Enero 30 ay magkakasunod na binigo ng Rain or Shine ang nagdedepensang San Miguel, 108-98, Alaska, 85-72, NorthPort, 107-100, at Phoenix, 98-94, para angkinin ang solong pamumuno sa torneo hawak ang 6-1 kartada.
Dahil dito ay nakatiyak na ang Elasto Painters ng tiket sa quarterfinal round.
Inaasahan namang magiging determinado ang Hotshots, naghari sa nakaraang 2018 PBA Governor's Cup, na makabangon mula sa 75-80 pagyukod sa TNT Katropang Texters at 92-113 kabiguan sa Beermen.
“Kailangan siguro, mag-start na kaming ibalik ulit ‘yung timing tsaka ‘yung rhythm namin. Kasi iyon ang kulang eh. Hindi kami makabuwelo ng dire-diretso,” sabi ni mentor Chito Victolero.
Sa unang laro, puntirya naman ng Aces ang kanilang ikalawang sunod na panalo matapos daigiin ang Columbian Dyip, 94-72, habang nakatikim ang Elite ng 67-85 pagkatalo sa Ginebra Gin Kings noong Sabado sa Davao City.
Hindi naglaro sina injured starters Vic Manuel, JVee Casio, Simon Enciso at Kevin Racal sa unang dalawang laban ng Alaska.
“Aminado naman ako na si Vic Manuel ang No. 1 option namin sa ilalim, tapos may outside shooting pa. Tulungan lang kami, ‘yun lang ang sinasabi ni coach (Alex Compton) sa amin,” ani forward Jake Pascual na humakot ng 13 points at career-high 13 rebounds sa nasabing panalo ng Aces kontra sa Dyip.
- Latest