Ginebra solo sa no. 3
MANILA, Philippines — Sa pagsisimula lamang ng first period pumalag ang Blackwater bago tuluyang dominahin ng Barangay Ginebra.
Pinabagsak ng Gin Kings ang Elite, 85-67 para sa kanilang ikalawang sunod na panalo at solohin ang ikatlong puwesto sa 2019 PBA Philippine Cup kahapon sa Davao del Sur Coliseum sa Digos City.
Nagposte si local hero Scottie Thompson ng 16 points, 11 rebounds at 5 assists para sa tropa ni coach Tim Cone.
Itinaas ng Ginebra ang kanilang record sa 3-2 sa ilalim ng Phoenix (5-0) at Rain or Shine (5-1) habang nalaglag ang baraha ng Blackwater sa 1-5.
Kumawala ang Gin Kings sa first quarter bitbit ang 10-point lead, 22-12 laban sa Elite hanggang palobohin ito sa 57-35 mula sa magkasunod na basket ni Thompson at three-point shot ni 6-foot-8 Japeth Aguilar sa 6:30 minuto ng third period.
Itinayo ng Ginebra ang 24-point advantage, 77-53 sa 7:56 minuto ng final canto na hindi na napababa ng Blackwater.
Samantala, pupuntiryahin ng Phoenix ang kanilang ikaanim na sunod na ratsada sa pagsagupa sa Rain or Shine ngayong alas-4:30 ng hapon
kasunod ang pagtutuos ng nagdedepensang San Miguel at Magnolia sa alas-6:45 ng gabi sa Smart Araneta Coliseum.
“Five-zero kami, 5-1 sila. Pero parang lamang sila because nakalaban na nila ang San Miguel and Barangay Ginebra,” sabi ni Fuel Masters coach Louie Alas sa Elasto Painters, may 5-1 baraha.
Sa ikalawang laro, target ng Beermen, nagmula sa 93-79 panalo laban sa Elite, ang kanilang ikalawang dikit na panalo sa pakikipagkita sa
Hotshots, nakalasap ng 75-80 kabiguan sa TNT Katropang Texters.
- Latest
