Mga banggiitang junior tennis players sa sugbo misidlak sa PHILTA Cup

CEBU, Philippines – Namunga ang mga paningkamot sa mga banggiitang junior netters  dinhi sa Sugbo  diin mipupo sila og unom ka bulawan sa PHILTA CTW Cebu Juniors Tennis Cup didto sa CitiGreen Tennis Resorts sa Barangay Punta Princesa, Cebu City.

Si Tiffany Nocos sa Dakbayan sa Lapu-Lapu maoy nangu sa kadaogan   uban ang duha ka bulawan pinaagi sa girls' 14 ug 16 divisions.

Gipilde ni Nocos ang taga-Iloilo nga si Alexa Feone, 6-0, 6-1 sa girls' 14-under finals, ug nasundan og laing daog  batok ni Mia Gemida sa Ormoc, 6-2, 6-2 sa girls' 16.

Si Elizabeth Abarquez sa Carcar mipilde  sab  ni  Gemida sa girls' 18 sa iskor 6-2, 6-3.

Sila si David Ezra Sepulveda ug Gio John Manito mipukan kontra nilang taga-Ormoc aron pagsakmit sa titulo sa ilang tagsa-tagsa ka dibisyon. Si Sepulveda mipilde ni Christian Laguna, 2-4, 4-2, 4-1 sa unisex 10-under finals, samtang si Manito midaog batok ni Renante Bravo, 5-7, 6-1, 10-3 alang sa boys' 12 title.

Si Venz Alforque sa Naga mitunol sa Team Cebu sa katapusang bulawan pinaagi sa boys' 18 division  human niya pildiha si Brent Cortes  sa Lanao, 7-5, 2-6, 10-8.

Wala hinuon mablanko si Cortes  kay  nakabitbit siya og champion's trophy pinaagi sa boy' 16 human gipilde si Rupert Tortal sa Surigao, 6-3, 6-4.