Roach: Pacquiao mura’g 21 anyos
CEBU, Philippines – Si Hall of Fame trainer Freddie Roach nasurprisa og maayo ni Manny Pacquiao sukad ang iyang boksingero naabot sa Amerika duha ka semana ang milabay.
Naobserbaran ni Roach nga nagpabilin ang kadasig ug kakugi ni Pacquiao sa training bisan pa man sa estado nga naabot niini karon.
Bisan og nasayud siya nga 40 anyos na si Pacquiao, sa iyang tan-aw murag 21 anyos pa og linihokan ang bugtong eight-division world champion sa kasaysayan sa boksing.
“I know he’s 40, but the thing is his work ethic is still the same as it’s always been,” dason pa ni Roach sigun sa taho ni Keith Idec sa BoxingScene.com. “You would think he’s a 21-year-old kid.”
Si Pacquiao maguwang og 11 ka tuig sa challenger niining si Adrien Broner apan wala mabalaka niini si Roach kay sayud man siya sa kapasidad ni Pacquiao, kansang abilidad iyang gibaid sud sa dul-an duha na ka dekada.
Anaa karon si Pacquiao (60-7-2, 39KOs) sa katapusang hunat sa iyang preparasyon sa umaabot niyang pagdepensa sa iyang WBA welterweight title batok ni Broner (33-3-1, 24KOs) karong Enero 20 (oras dinhi sa Pilipinas) didto sa MGM Grand Garden Arena sa Las Vegas, Nevada.
Nagkanayon si Roach nga kondisyon kaayo si Pacquiao ug anaa kini sa labing nindot niining porma 10 ka adlaw sa dili pa kini makigsinukmagay ni Broner.
“He’s in great shape. He’s moving well and doing rounds, no problem. He’s ready to go. We’ve just gotta keep everything in control. He was in much better shape than I expected when he got here. He’s in beautiful shape. He’s running very well and he’s ready for this guy,” matud pang Roach agig padayag sa kaandam ni Pacquiao batok ni Broner.
- Latest
