Rose way 'pake' sa All-Star

Hayag na nga makabalik isip All-Star si Minnesota Timberwolves guard Derrick Rose tungod sa nindot niyang gipakita sa season, apan ang kanhi MVP miingon nga wala niya kini hatagi og gibug-aton.

Nalipay hinuon si Rose sa pagsalig sa mga basketball fans ngadto kaniya, apan giklaro niya nga tumong niya sa season mao ang mapakita nga dili pa siya laos human sa pipila ka season nga wala katarung og duwa tungod sa injury.

Blackwater nakig-trade na usab

Wala pa mahuman ang Blackwater Elite sa pagpalig-on sa ilang koponan human sila malambigit sa laing trade, ning higayuna uban sa Phoenix Fuel Masters.Ang Elite mibuhi sa ilang scoring point guard nga si John Pinto ngadto sa Fuel Masters bugti sa Fil-foreign nga si Joseph Eriobu ug Gelo Alolino.

Gituohan nga si Pinto gi-trade sa Blackwater sa Phoenix tungod kay nanobra na sila sa guwardiya ilabi na sa pagsud sa mga rookies nga sila si Ray Parks Jr. ug Cebuano Paul Desiderio.

Lisud nga debut sa Azkals

Ang Philippine Azkals mag-atubang og lisud nga sangka sa ilang Asian Cup debut karong adlawa sa ilang pakigharung sa power-house nga South Korea didto sa UAE.

Maisip nga dakung underdog ang Azkals tungod kay ang South Korea maoy usa sa mga gitan-aw nga sayung title contender uban sa Japan, Australia ug China.