PTA modawat pa sa 'bully' nga tinun-an
CEBU, Philippines — Usa ka semana human nila gitangtang nila isip miyembro ang nang-bully nga tinun-an sa Ateneo de Manila University, si Philippine Taekwondo Association president Robert Aventajado miingon nga may tsansa pa kini nga dawaton nila pagbalik.
Nasayran nga ang PTA mitangtang sa maong high school student human migawas ang mga video ug napuno sa pagsaway ang maong tinun-an dihang gidagmalan niya ang iyang mga classmates.
Ang PTA mihimo dayon og lakang aron mapanalipdan ang ilang sports human nakita nga gigamit sa maong tinun-an iyang nakamahoan sa taekwondo aron makasakit sa iyang kaubang tinun-an.
Hinuon, si Aventajado miingon nga dili nila talikdan ang kanhi nila sakop kun mopakita ang maong tinun-an nga nagbag-o na kini.
"If he shows remorse and undergoes rehabilitation, the PTA will welcome him back," matud pa ni Aventajado sa The Philippine Star. "It's all about giving this young taekwondo practitioner a second chance. But he must show remorse.”"
Samtang wala pa mipakita kanila ang tinun-an og interes nga mobalik, ang PTA nagdili sa maong tinun-an nga mosalmot sa mga torneyo sa taekwondo. Nasayran, nga ang maong tinun-an usa ka medalist sa mga torneyo didto sa kaulohan.
- Latest
