28th Cebu City Olympics banatan na

CEBU, Philippines – Kapin sa 15,000 ka  atleta gikan sa nagkalain-laing eskwelahan  sa elementarya ug sekondarya ang mopakita na og aksiyon sa pagbukas sa 28th Cebu City Olympics karong adlawa sa nagkadaiyang mga binyu.

Ang maong mga tunghaan lakip na ang mga sakop sa Cebu Schools Athletic Foundation Inc. magtigi sa 26 ka mga sporting events sud sa upat ka adlaw.

Lakip sa tigian mao ang archery, arnis, athletics, badminton, billiard, boxing, football, scrabble, sepak takraw, swimming, baseball, softball, basketball, chess, cultural, gymnastics, karatedo, taekwondo, wrestling, wushu, pencak silat, dancesport, futsal, tennis, table tennis ug volleyball.

Kasagaran sa mga duwa anha ipahigayon sa Cebu City Sports Center ug SM Seaside City. Ang CCSC mo-host sa athletics, badminton, billiard, boxing, football, scrabble, sepak takraw ug swimming, samtang ang chess, cultural, gymnastics, karatedo, taekwondo, wrestling, wushu ug pencak silat adto sa SM. Ang baseball ug softball duwaon sa Labangon Elementary School, archery sa Sugbu Compound sa South Road Properties (SRP), arnis sa Ramon Duterte Memorial National High School, dancesport sa Cebu City Sports Institute, futsal sa Don Bosco Technical Center gym, tennis sa City Green, table tennis sa University of Cebu Table Tennis gym, volleyball sa University of Southern Philippines Foundation gym, samtang ang basketball duwaon sa tulo ka venues nga mao ang Cebu City Sports Institute, Cebu Eastern College ug Cebu Coliseum.

Ang Cebu City Olympics magsilbeng selection process alang sa  mahimong representante sa Team Cebu City sa  Central Visayas Regional Athletic Association (CVIRAA) Meet.