Warriors gibalia'g' pako' ang hawks
CEBU, Philippines – Nakahimo gihapon sa pagdaog ang Golden State Warriors bisan wala moduwa ang na-injured nilang alas nga si Stephen Curry ug ingon man si Draymond Green nga gisuspenso og usa ka duwa nunot sa ilang panagsungi ni Kevin Durant (basaha ang laing estorya).
Gumikan niini, si Durant maoy miagak sa opensa ug gipangulohan ang Warriors nga mitiklo sa Atlanta Hawks, 110-103 sa duwa nila sa NBA kagahapon didto sa Oracle Arena sa Oakland, California.
Gawas ni Durant nga mikadlit og 29 puntos, misalida sab si Klay Thompson nga mikolekta og 24 puntos. Nakatabang sab og dako sa Warriors si Jonas Jerebko nga mitali og 14 puntos ug milangkat sab og 14 ka rebounds.
Si Taurean Prince miposte og 22 puntos, apan walay nahimo gumikan kay ang Hawks nasugamak sa ikalima nilang sunod-sunod nga pilde ug ikasiyam sa kinatibuk-an sud sa 10 ka duwa.
Didto sa Denver, si James Harden miiskor og 19 sa iyang 22 puntos sa second half sa dihang gitunolan sa Houston Rockets ang Denver Nuggets sa ikaupat niining sagunson nga pilde, 109-99.
Si Harden mipasa sab og 11 ka assists, sagad niini ngadto ni Clint Capela nga maoy nangu sa Rockets uban ang 24 puntos, apil na niini ang pipila ka dunks.
Miamot si Chris Paul og 21 puntos alang sa Rockets nga miduwa sa ikatulong higayon nga wala si Carmelo Anthony.
Hingpit nga gitak-op sa Rockets ang daog human sila milabaw og 13 puntos, 104-91 sa nahibilin nga 3:48 sa duwa.
Si Monte Morris dunay 19 puntos, samtang sila si Gary Harris ug Jamal Murray parehong miiskor og 15 alang sa Nuggets nga nakatilaw sa ikawalo nilang sagunson nga pilde sa mga kamot sa Rockets.
Sa laing aksiyon, si Jordan Clarkson mibahog og 24 puntos ug si Tristan Thompson mikolekta og 21 puntos alang sa Cleveland Cavaliers nga midaog sa ikaduha pa lamang nga higayon karon nga season human gilubong ang Charlotte Hornets, 113-89.
Gisanta sa Cavs ang lima ka sunod-sunod nilang pilde bisan pa man og nabulit sila og injury nilang All-Star forward Kevin Love, starting point guard George Hill ug forward Sam Dekker.
Si Rodney Hood mihipos og 16 puntos alang sa Cavs milabaw og 25 puntos atol sa katapusang kuwarter hinungdan sa pagkabarag sa Hornets sa nahibiling bahin sa duwa.
- Latest