Mayweather mikansel sa iyang away sa Japan
CEBU, Philippines – Gikansela ni boxing superstar Floyd Mayweather Jr. ang plano niyang away batok sa usa ka Hapon nga kickboxer.
Sa hataas niyang pamahayag sa iyang social media, si Mayweather mialegar nga nailad siya sa mga nagpasiugda sa maong away batok ni Tenshin Nasukawa nga gikatakda unta bisperas sa Bag-ong Tuig didto sa Saitama, Japan.
"I want it to be clear that I, Floyd Mayweather, never agreed to an official bout with Tenshin Nasukawa," suwat pa ni Mayweather sa iyang Instagram.
Ang 41-anyos nga retiradong welterweight champion misaysay nga mibiyahe siya sa Japan sa miaging semana aron hisgutan ang pribado unta niyang sangka batok ni Nasukawa nga saksihan sa pipila lamang ka mga adunahan nga manan-aw bugti sa dako kaayong bayad kaniya.
Apan sa iyang pag-abot sa press conference didto sa Tokyo niadtong Lunes, si Mayweather nagkanayon nga siya ug ang iyang grupo natingala gumikan kay nausab na man ang direksiyon sa away.
Diha-diha si Mayweather nakahukom nga undangon ang tanan kay sukwahi man kini sa nahiuna nilang nasabotan sa Japanese promoters.
Dungan niini, si Mayweather nangayo og pasaylo ngadto sa iyang mga fans gumikan sa walay klarong impormasyon nga ilang gianunsiyo atol sa press conference.
- Latest