Game 1 sa Lancers ug Jaguars

CEBU, Philippines – Managlahi nga misyon ang sagubangon sa two-time defending champion University of the Visayas (UV) Green Lancers ug University of San Jose-Recoletos (USJ-R) Jaguars sa dihang ila nang sugdan ang ilang 'best-of-three' finals series sa collegiate division sa 18th Cebu Schools Athletic Foundation, Inc. (CESAFI) men's basketball tournament diha sa Cebu Coliseum karong adlawa.

Tinguha sa Lancers nga maka-'grandslam', samtang ang Jaguars nanghinaut nga makadaog og titulo sa labing unang higayon sa ilang panag-abot sa alas 6:45 sa gabii human sa tagakay nga duwa alang sa ikatulong dapit tali sa University of Cebu (UC) Webmasters ug University of San Carlos (USC) Warriors sa alas 5:15 sa hapon.

Ang USJ-R katapusang nakadaog og kampiyonato 25 ka tuig  ang milabay sa dihang ang CESAFI nailhan pa nga Cebu Amateur Athletic Association (CAAA). Gipangulohan nilang John Ferriols ug Maui Huelar, ang kasamtangang head coach sa Jaguars nga si Leode Garcia rookie pa niadtong higayona. Karon, si Garcia naglaraw og laing kasaysayan isip labing unang coach nga makabira og korona sa iyang rookie season.

Andam na kaayo si Garcia sa hagit nga nag-atang kaniya sa unahan. Ang Jaguars nga gitimon pa ni kanhi   rookie coach Edito Salacut, katapusang miabante sa finals niadto pang 2008.

Ubos sa pagpangu nilang  Armand Ponce, Luther Luke Justiani, Ranulfo Malinao, Manny Gabas, Randy Pogoy, Lyndon Gudez, Bobby Hatague ug Jessmar Villahermosa, ang Jaguars inilog niadtong higayona, apan naparot sila sa UV Lancers nga gipangulohan sa higanteng si Greg Slaughter.

Ang Jaguars nangambisyon nga makabawos sa Lancers ning higayona.

Sama ni Garcia, si UV coach Gary Cortes nangandam sab alang sa usa ka dakong gubat batok sa Jaguars. Madasigon ang Lancers nga ilang malayatan ang katapusang babag sa ilang damgo nga maka 3-peat.

Nindot kaayo ang tapad sa duha ka magkaribal, apan tataw nga si USJ-R import Segamars Ewenike mas mangtas kay ni Bassieru Sackor sa UV.

Armado sab ang Lancers sa gikaintapang kombinasyon nilang Rey Anthony Suerte, ang 2016 Most Valuable Player ug Josue Segumpan, apan ang Jaguars dunay tubag kanila nga mao sila si Jaybie Mantilla, ang reigning Seniors MVP, ug Ralph Jude 'RJ' Dinolan.

Modugang o kabagsik sa Lancers mao sila si Jancork Cabahug, Gileant Delator, Jim Paul Amistoso, Jafet Claridad, Ted Saga ug Michael Maestre.

Sa habig sa Jaguars, makalaum sab kini nilang Tricky Peromingan, Juan Miguel Gastador, Nicole John Ubalde, Fletcher Galvez ug Elmer Echavez aron motabang og lukdo sa ilang opensa.