Best of the Best C’ships kasado na sa Sept. 1-2

MANILA, Philippines — Idaraos ng Philippine Taekwondo Association ang kanilang premier event -- ang 2018 SMART/MVP Sports Foundation Best of the Best Championships -- sa Setyembre 1-2 sa Ayala Mall’s South Park sa Alabang, Muntinlupa tampok ang kabuuang 750 partisipante.

Ipapakita ng mga top blackbelts mula sa 12 regions kasama ang ARMM, CAR, CARAGA at National Capital Region (NCR) ang kanilang mga talento sa prestihiyosong torneo.

Sasabak ang mga fighter na may Olympic weight sa senior division habang makikita naman sa aksyon ang mga may WTF weight sa Junior, Cadet at Grades school divisions.

Ang mga kompetisyon ay gagawin sa Kyorugi (free sparring) at Poomsae (forms).

Inasasahang ididisplay ng mga poomsae contenders ang mataas na antas ng foot techniques sa taekwondo kagaya ng jumping yopachgi, 720 spinning kick at kicking na may acrobatic actions.

Makakasali lamang sa torneo ang mga gold medal winners sa national events kagaya ng NCR Luzon, Visayas at Mindanao pati na ang mga nanalo sa UAAP, NCAA, AFP-PNP Olympics at lahat ng PTA competitions sa Metro Manila at iba pang rehiyon, mula Taekwondo Blackbelt Brotherwhood, Taekwondo Blackbelt Sorority at Philippine team, ayon kay tournament director Jesus Morales III.

Solidong suporta ang ibinigay ni  Manuel V. Pa­ngilinan, ang chairman ng SMART Commuinications at PLDT at patron ng Philippine Taekwondo, sa mga jins sa kanyang hangaring magkaroon ang bansa ng kauna-unahang Olympic gold medalist.