Explorer, Butch surveying sud semis
CEBU, Philippines – Gipilde sa Explorer ug Butch Surveying ang ilang tagsa-tagsa ka kaatbang aron moabante sa semifinals sa CELBA Season 3 basketball tournament niadtong Sabado didto sa Canduman Housing gym, Dakbayan sa Mandaue.
Ang Explorer mipukan sa CCT Builders, 80-71, samtang ang Butch Surveying midemolis sa Krizia, 90-75 aron maangkon ang unang duha ka luna sa semis.
Kontrolado sa Explorer ang duwa gikan sa pagsugod hangtod na sa katapusang gutlo.
Upat ka players sa Explorer ni Alan Buenavista ang miiskor og double figures pinangulohan ni Ai-Ai Setenta nga mikadlit og 15 puntos, gisundan ni Nick Molit nga mipugnit og 13 puntos. Sila si Jun Aseo ug Noel Ferolino mitampo'g 12 ug 11 puntos sa Explorer nga mitala og 39-25 sa halftime nga maoy gihimo nilang taytayan sa kadaogan.
Ang CCT Builders ni Engr. Chucho Tan gipangulohan nilang Richard Madrid ug Francis Palero nga nagkumboya'g 30 puntos.
Sa laing bahin, si Ramie Suson nagbangis sa fourth period diin miiskor siya og 14 sa kinatibuk-an niyang 25 puntos aron pangulohan ang Butch Surveying nga wala na molingi human mailog ang labaw, 57-56 sa sayong bahin sa maong kuwarter.
Si Raul Mahusay miamot og 15 puntos, samtang si Beinsin Herbieto mitampo'g 13 puntos sa kadaogan.
Mipauwan og pito ka tres si Badon Herbieto sa iyang 32 puntos, apan nakawang lang kay wala makalahutay ang kusog sa Krizia.
Ang team owner nga si Arthur Lelis miambit og 10 puntos sa napilde niyang koponan.
Ang liga gimugna ni S/Insp. Dondon Coloscos ug ang mga duwa gipadagan nilang Willy Medillo, Lloyd Chavez, Richard Limosnero ug Wendel Oquias.
PUNTOS MATAG USA
Unang duwa:
EXPLORER (80) – Setenta 15, Molit 13, Aseo 12, Ferolino 11, Ochea 7, Gomez 7, Yares 4, Puerto 4, Limosnero 4, Medillo 2, Amancio 2, Costanilla 2.
CCT Builders (71) – Madrid 17, Palero 13, Tan 9, Quiñahan 7, Borces 7, Solana 6, Flores 3, Beldera 2, Bucabal 2, Cena 2, Alburo 1.
Ikaduhang duwa:
BUTCH Surveying (90) – Suson 25, Mahusay 15, B. Herbieto 13, Gonzaga 9, E. Alcover 9, Cabonelas 8, Monterola 5, Migallen 2, Cabucos 2, Castillo 2.
KRIZIA (75) – B. Herbieto 32, Lelis 10, Cuizon 6, D. Herbieto 6, Oquias 5, T. Herbieto 4, Fegi 4, Suico 4, Padayogdog 2, Alilin 2.
- Latest
