Kadaogan sa Talisay sa Gov's Cup

CEBU, Philippines – Natubag nga mga pag-ampo.

Mao kini ang paghulagway sa Talisay City AquaStars sa   kalampusan nga ilang natagamtaman sa bag-o lang natapos  nga  2018 Cebu Governor's Cup Inter-Cities and Municipalities Under-21 Developmental  Basketball Tournament.

Ubos sa pagtimon ni coach Rey Gurrea, gi-sweep sa South Division title-holder Talisay ang North champion San Francisco sa ilang 'best-of-three' finals bugti sa  kadaogan nila sa Game 5 sa iskor nga 66-64  aron  paglangkat sa korona sa tulo ka bulan nga liga niadtong miaging gabii didto sa Big Apple Sorts Center sa San Francisco, isla sa Camotes.

Gawas nga midaog sa P500,000 nga ganting salapi nga ilang madawat karong Agosto 24 atol sa kasaulogan sa ika-449 nga anibersaryo sa pagkahimugso sa Probinsya sa Sugbo, ang AquaStars mikulit sab og rekord sa paghuman niini sa torneyo nga wa'y pilde sa 14 ka duwa.

"Lipay kaayo ang mga opisyales, apan labaw nalipay ang yanong mga Talisaynon kay 14-0 gud, wa'y  pilde-pilde," matud pa ni Talisay City Mayor Eduardo 'Eddiegul' R. Gullas atol sa simple nilang victory party niadtong Huwebes sa gabii diha sa ilang city hall.

Si Konsehal Rodi Cabigas nga mao sab ang tsirman sa Talisay City Sports Commission, nagkanayon nga mas disiplinado ang ilang korona karon kon itandi sa miaging season.

"Dili sila kompleto kon magpraktis last year. Pirme lang sila kulang. Mas disiplinado na sila karon ug amo gyud sila gi-motivate og maayo," matud pa ni Cabigas.

Ang hugtanong suporta sa Talisay LGU nagkupot sab og dakong papel sa naangkon nga dungog sa  AquaStars nga angayan nilang ikapasigarbo.

"Full support gyud ang atoang Talisay LGU. Very supportive kaayo sila si Mayor Eddie Gullas, Vice Mayor Allan Bucao and Congressman Samsam Gullas mao nang nadasig sab og maayo ang ato mga players," dugang pa ni Cabigas.

Apan labaw sa tanan, si Cabigas nagkanayon nga ang gahom sa pag-ampo naghatod gyud og kaayohan kanilang tanan.

"Amo gyud gisud sa dughan nga kinahanglan ang mga bata before sa duwa moadto gyud sa simbahan.  Like kanang naa mi duwa sa South, mohapit gyud mi sa San Vicente Ferrer Parish sa Pitalo (San Fernando)," sumala pa ni Cabigas. "Kining among kadaogan, answered prayers ni. Amo gyud ni giampo kay ang Ginoo man maoy magbuot sa tanan bisan unsa pa kalig-on ang imong team."