Talisay kampiyon sa Gov's Cup

CEBU, Philippines — Giharos sa Talisay City AquaStars ang karibal nilang San Francisco, 66-64 sa Game 2 sa ilang 'best-of-three' finals series aron paglangkat sa korona    sa  2018 Cebu Governor's Cup Inter-Cities and Municipalities Under-21 Developmental Basketball Tournament niadtong Miyerkules sa gabii didto sa Big Apple Sports Center sa San Francisco, isla sa Camotes.

Miduwa sa teritoryo sa ilang mga kaaway, ang AquaStars ni coach Rey Gurrea mipakita og dako nga kasingkasing ug ingon milusad og bangis nga opensiba aron tuldokan ang mabulukon nilang kampanya bitbit ang perpektong 14-0 record.

Ang kadaogan sa Talisay nagsemento sab sa dominasyon sa South Division teams ning duha pa ka tuig nga liga nga naghatag og paglaum sa mga batan-ong baskebolista nga makabaton og sanag nga kaugmaon. Ila sab nga gipabilin ang korona sa unang distrito sa Sugbo human sa makasay-sayanon nilang  daog sa Minglanilla Archangels sa miaging tuig.

"The Governor's Cup puts tremendous impact to the youth in the towns. The hopes of earning scholarships. The hopes of playing through college. The hopes of a better life ahead. That is what this league is all about. That is what we at the organizing committee side is hoping for," matud pa ni Cebu Provincial Sports Commission Executive Director Atty. Ramil P. Abing.

"Congratulations to Talisay City for a job well done and to San Francisco for proving that talents do not lie on the mainland alone. They showcase heart of Camotes Island. I am looking forward to a bigger Governor's Cup next year," dugang pa ni Abing.

Ang San Francisco maoy mikadlit sa unang siyete puntos sa duwa, apan ang AquaStars pinaagi sa panglimbasog nilang Jay Deiparine, Elmer Echavez, Ronan Briones ug Rodel Beduya mibawos aron moabante og dos puntos sa halftime, 31-29.

Miresbak sab ang San Francisco sa ikatulong kuwarter kortesiya nilang Kenny Rogers Rocacurva ug Winston Pleños Jr., apan ang Talisay sa kanunay dunay tubag sa ilang ataki aron  makatabla, 45-45  human sa tulo ka kuwarter.

Si Rocacurva misuway paghatag og kinabuhi sa SanFran, apan ang Taliay wala magpaalkansi pinaagi sa maayong salida nilang  Echavez ug Kendrick Abarquez.

Katapusan nga nakasikit ang SanFran sa iskor nga 64-66 human sa tres ni Jake Gonzales sa nahibiling kuwatro segundos sa duwa.

Si Echavez miiskor og 11 sa iyang 21 puntos sa katapusang kuwarter, si Beduya mitampo og 10, samtang sila si Taburnal ug Raffy Bacasmas nagkumboya  og 18 puntos alang sa Talisay nga mibulsa og P500,000. Ang SanFran nakadawat og P300,000.

Si Rocacurva maoy nangu sa San Francisco uban ang 18 puntos, samtang sila si Pleños ug Gonzales dunay 15 puntos matag usa sa pilderong koponan.