Team Pacquiao pa-Malaysia ngayon

MANILA, Philippines — Sumabak si Manny Pacquiao sa limang sparring rounds noong Sabado sa kanyang training camp sa General Santos City.

Nakita ni Filipino chief trainer Buboy Fernandez ang pagiging kalmado at kumpiyansa ng Filipino world eight-division champion sa pagsagupa kina Pinoy fighter Jheritz Chavez at Australian lightweight George Kambosos Jr. sa sparring session.

Naniniwala si Fernandez na 100 porsiyento nang handa si Pacquiao na labanan si world welterweight king Lucas Matthysse sa Hulyo 15 sa Axiata Arena sa Kuala Lumpur, Malaysia.

Nakatakdang bumiyahe ngayong araw ang Team Pacquiao patungo sa Kuala Lumpur habang noong nakaraang linggo naman dumating sa Malaysian capital ang grupo ni Matthysse.

Determinado ang 39-anyos na si Pacquiao na maagaw sa 35-anyos na si Matthysse ang suot nitong World Boxing Association welterweight belt para sa kanyang unang pag-akyat sa ring matapos maisuko ang hawak na World Boxing Organization welterweight crown kay Jeff Horn noong Hulyo ng 2017 sa Brisbane,  Australia.

Isasaere ang bakbakan nina Pacquiao (59-7-2, 38 KOs) at Matthhysse (39-4-0, 36 KOs) sa ESPN+ sa United States.

“I am very happy that all of my fans in America will have a chance to watch my next fight on ESPN+, and I am looking forward to putting on a show,” ani Pacquiao.

Aminado si Pacquiao na hindi dapat balewalain ang kakayahan ng Argentinian champion.

“Matthysse is a great opponent. I am training with all of my heart because I want to be champion again,” dagdag ng Filipino boxing great.

Ang Pacquiao-Matthysse fight ay ipapalabas ng Top Rank Promotions ni Bob Arum sa US.

Hangad ni Pacquiao ang isang knockout victory laban kay Matthysse. Huli niya itong nagawa noong Nobyembre ng 2009 matapos pasukuin si Miguel Cotto sa 12th round para maagaw sa Puerto Rican ang bitbit nitong WBO welterweight crown.