Yoyi's Pastries, Angel Mary Pawnshop abante sa semis

CEBU, Philippines — Nakuha sa defending champion Yoyi's Pastries & Dessert ug Angel Mary Pawnshop ang katapusang duha ka luna sa semifinals sa FYA Ballclub Season Basketball  Tournament 2018.

Kini human ang Yoyi's Pastries nakaeskapo bitbit ang 81-79 nga kadaogan batok sa Soontit Construction ug ang Angel Mary Pawnshop mipaluhod sa Micaela, 98-81 sa tagakay nga quarterfinals niadtong Domingo didto sa Vicente Sotto gym sa Punta Princesa, dakbayan sa Sugbo.

Sila si Jao Rabadon ug team manager Alhmark Albarracin nagkumboya'g 41 puntos aron mangu sa scoring sa Yoyi's Dessert nga nakataak gyud sa tungason nga kadaogan.

Laing miiskor og double figures mao si Jas Sydiongco sa iyang 17 puntos ug Jim Rara nga adunay 13 puntos.

Ang natagak nga Soontit Construction gipangulohan sab ni ballclub president Dexter Caballero nga miugbok og 23 puntos, gisundan ni Christian Laud nga miugkat og 20 puntos.

Sa laing bahin, ang naanghelan nga Angel Mary Pawnshop gipangulohan ni Ashley Mendoza nga mikolekta og 21 puntos. Wala sab magpaalkanse si team manager McLain Alkuino  nga mikamada og 18 puntos, samtang si Albert Encarguez miamot og 14 puntos.

Sa gihapon, ang Micaela nilang Noel Medalle ug Edgar Noquillo gipangulohan ni Ryan Villaver nga mirehistro og 19 puntos, sila si Ranel Patalita ug Derick Tabares nagkumboya'g 29 puntos.

PUNTOS MATAG USA

Unang duwa:

YOYI'S Pastries (81) – Rabadon 21, Albarracin 20, Sydiongco 17, Rara 13, Salvador 4, Mata 4, Martinez 2.

SOONTIT Const. (79) – Caballero 23, Laud 20, Manila 17, Macachor 7, Regudo 4, Trocio 4, Manalili 3, Laput 1.

Ikaduhang duwa:

ANGEL Mary (98) – Mendoza 21, Alkuino 18, A. Encarguez 14, Ramirez 11, Godofredo 10, Cabreros 9, Lavandero 9, M. Encarguez 4, Samson 2.

MICAELA (81) – Villaver 19, Patalita 17, D. Tabares 12, N. Medalle 9, Arias 7, E. Noquillo 6, Abella 6, Abay 5.