Managsuong koponan parehong nangapilde

CEBU, Philippines — Matawag nga walay suwerte ang mga managsuong koponan sa ilang duwa kay pulos kini nangapilde batok sa ilang tagsa-tagsa ka kaatbang  sa  J&J Surplus   Ballclub  Season  12  basketball tournament niadtong Sabado didto sa GT Academy gym sa Tayud, Lilo-an.

Unang nabiktima mao ang Louise Go Trucking human madisgrasya sa Domz Autoparts Supply sa iskor nga 94-80 nga nakahaybol sa ilang rekord, 3-1 ug samtang ang 4Nichol's Farm nasugamak ngadto sa Victorious Safety Industrial, 78-74.

Sa sayo pa, ang J&J Surplus ni ballclub president Henry Agbon mipilde sa D' Jammers, 91-83 alang sa ilang 2-3  nga baraha.

Balanse ang opensiba sa Domz Autoparts ug pruyba niini mao ang lima ka players niini ang miiskor og double figures nga gipangulohan ni Gerald Bercero sa iyang 22 puntos.

Human maalkanse og tres puntos sa first quarter, 18-21, ang dagko nga Domz Autoparts ni Domz Mercader kalit nga miarangkada ug yano kaayong midaro sa huyang nga depensa sa gagmay'ng Louise Go Trucking aron moposte og 67-54 nga bentaha human sa tulo ka kuwarter. Namintinar nila ang double digits nga labaw hangtod nahuman ang duwa.

Si Almer Icot mao sab ang topscorer sa Louise Go Trucking nga miratsada og 31 puntos.

Sa laing bahin, si Jessie Tubod mihakot og 29 puntos aron mangu sa opensa sa Victorious Safety Industrial nga nakabangon human malubong og 15 puntos sa first period sa iskor nga 14-29.

Sila si Norman Patalot ug Ryan Sasing nagkumboya'g 24 puntos.

Kuyaw kaayo ang duwa sa Victorious Safety Industrial sa second quarter diin mirehistro sila og 27 puntos batok sa tres puntos nga nahimo sa 4Nichol's Farm aron motanom og 41-32 nga bentaha sa halftime ug wala na sila molingi pa sukad niadto.

Ang mga duwa ubos sa superbisyon ni league commissioner Fury Trazona sa abag nilang Chang Tejero, Choy Pilapil ug Chigz Gesulga.

Gisuportahan sab kini sa Victorious Safety Industrial, J&J Surplus ug E&F Surplus isip major sponsors.

Puntos Matag Usa

Unang duwa:

J&J Surplus (91)  – Adulfo 30, Herra 15, Dela Rama 13, Genterolizo 8, Yuson 7, Romaguera 6, H. Agbon 4, J. Agbon 4, Astillero 4.

D' JAMMERS (83) – Lorca 23, Illustrisimo 22, Illustrisimo 19, Pacilan 12, Toci 8.

Ikaduhang duwa:

DOMZ Autoparts (94) – Bercero 22, Luarez 17, Bucatan 15, Cadao 13, Mulang 13, Arevalo 8, Mercader 4, Missy 2.

LOUISE GO Trucking (80) – Icot 31, Lauron 19, Hernando 8, Gocela 7, Apas 6, Cortes 6, Pepito 2.

Ikatulong duwa:

VICTORIOUS (78) – Tubod 29, Patalot 13, Sasing 11, Badajos 6, JL James 6, Bayonla 5, Lascuna 3.

4NICHOL'S Farm (74) – Cañete 18, James 16, Lascuna 14, Roland 13, Marwin 4, Berandal 3, Baen 2. (BANAT NEWS)