World title isunod ni Barriga
CEBU, Philippines — Gipamatud-an ni Mark Anthony Barriga nga hinog na siya alang sa world title fight human sa iyang kadaogan batok ni Colombian Gabriel Mendoza atol sa ilang IBF minimumweight title eliminator sa miaging gabii didto sa Quezon City.
Ang 24-anyos nga si Barriga wala malisang bisan pa og usa ka kanhi world title challenger si Mendoza ug iyang gilumsan og kinumo ang kaatbang niya nga miresulta sa 120-108, 120-18, 119-109 nga labaw sa scorecards sa tulo ka hurado sa 12 ka hugna nilang sangka.
Sa maong kadaogan, ang kanhi Pinoy amateur standout aduna na'y 9-0, 1KO ug iyang gipahamtangan si Mendoza sa ikaunom niining pilde sa 36 ka away.
Si Barriga miingon nga dili magdugay iyang selebrasyon ug mangandam dayon siya alang sa world title fight sa hinapos nga bahin ning tuiga.
Magpaabot pa hinuon si Barriga sa resulta sa title defense ni reigning Japanese champ Hiroto Kyoguchi (9-0, 7KOs) nga manalipod sa iyang bakus batok Vince Paras karong Mayo didto sa Japan.
Sa susamang fight card, midaog usab ang laing tulo ka mga Bisaya nga boksidor nga sila si Marvin Sonsona, AJ Banal ug Genesis Servania batok sa tagsa-tagsa nila ka mga kaatbang gikan sa Indonesia.
Si Sonsona midaog pinaagi sa puntos batok ni Arief Blader, samtang si Banal mikulata ni Master Suro ug si Servania mipahayang ni Jason Butar-Butar. (BANAT NEWS)
- Latest
