Pacquiao mitaak sa sugbo

CEBU, Philippines – Mitaak dinhi sa Sugbo si Pinoy ring star Manny Pacquiao dili alang sa boksing kon dili sa basketbol.

Si Pacquiao nakigtigum sa tanang mga stakeholders sa commercial basketball sa tibuok Kabisay-an ug Mindanao kagahapon sa Waterfront-Cebu City Hotel and Casino aron ipadayag ang iyang plano nga dad-on ang Maharlika Pilipinas Basketball League (MPBL) sa Vis-Min region. 

Si Pacquiao maoy nagtukod sa MPBL niadtong Agosto 2017. Naglangkob kini og regional commercial teams nga magdala sa pangan sa ilang dapit sama niadtong nabungkag nga Metropolitan Basketball Association (MBA).

Ang labing unang MPBL conference nga giulohan og Anta Rajah Cup misikad niadtong Enero 25 ug gisalmotan og 10 ka teams. Ang Batangas City Athletics maoy migawas nga labing unang kampiyon sa liga.

Karon gusto ni Pacquiao nga himuon ang MPBL nga usa ka nasudnong liga nga dunay aktibong partisipasyon sa mga koponan gikan sa Visayas ug Mindanao.

Si league commissioner Kenneth Duremdes, usa sa mga   PBA all-time greats, nanghinaut nga ilang makab-ot ang ilang  tumong sa dili pa magsugod ang second conference karong Hunyo 12.

Matud pa ni Duremdes nga ang labing una nilang tibuok nga season bahinon sa Northern ug Southern divisions. Ang division champions mag-abot dayon sa national finals diin ang modaog makadawat og bulawang tropeyo nga nagkantidad og P10 million ug ingon man singsing sa tanang miyembro sa champion team.

Tulo ka teams sa Cebu ang mipadayag na sa ilang tinguha nga mosalmot sa liga ni Pacquiao. Kini mao ang International Pharmaceuticals, Inc. (IPI), Cebu  Landmasters ug M. Lhuillier.

Mosakay sab  ang Zamboanga, Davao, Cagayan de Oro, Bacolod ug General Santos City sa gitinguha ni Pacquiao.

Duna hinooy mga yangungo ug kabalaka ang kinabag-an sa mga teams apil na ang P10 million nga franchise fee ug ang home-away format kay gasto man kaayo alang sa usa ka team gikan sa probinsiya nga magsige og biyahe didto sa kaulohan ug ubang dapit sa Luzon.