Soontit construction giluwas ni Caballero

CEBU, Philippines — Ang krusyal nga free throws ni Dexter ‘El Presidente’ Caballero sa nahibiling 23 segundos sa fourth quarter maoy nakasalbar sa  Soontit Construction batok sa  Noah, 102-101 sa FYA Summer League 2018 Season 21 basketball tournament didto sa Vicente Sotto gym sa Punta Princesa, dakbayan sa Sugbo.

Anaa na unta sa baba sa kadaogan ang Noah dihang labaw sila og usa ka lugas, 101-100 sa daginutong segundos sa duwa, apan ang ilang paglaum gipapas ni Caballero nga kalmado kaayong mipasud sa duha niya ka free throws.

Si Caballero mihipos og 24 puntos, apan ang  topscorer mao si Mervin Manila nga mipatuasik og 28 puntos nga igo na kaayo aron ilhon isip best player.

Laing naka-double figures sa Soontit Construction mao sila si Vito Tabares, Romel Laput ug Soc Trocio.

Lima sab ka players sa Noah ang mihimo'g double figures ubos sa pagpangulo ni Juvenile Enriquez nga mikamada og 25 puntos, gisundan nilang Wendel Abella ug G. Garcia nga parehong mitimbre'g 14 puntos. 

Sila si Dodee de Gracia ug Balag Atuel nagkumboya'g 25 puntos sa Noah.

Ang Soontit Construction ni John Soontit nagbitbit na og 1-1 nga baraha, samtang ang Noah ni Jobert Barro wala pa'y daog sa duha ka duwa.

Sa laing aksiyon, ang Harold's Hotel mirehistro sa ikaduha nilang sunod-sunod nga daog human gidemolis ang Angel Mary Pawnshop, 103-93.

Nangu sa kadaogan si Niko Laborte, kansang 26 puntos nakapahimo kaniya nga best player of the game. Nakatampo sab og dako si Bornong Endrina nga miamot og 21 puntos ug si Ryan Dacayanan nga miambit og 17 puntos.

Samtang sila si Edmar Jumantoc ug Baeng Medalle mitimbre'g 12 ug 10 puntos sa Harold's Hotel ni Arnel Trinidad.

Ang Angel Mary Pawnshop gipangulohan ni Val Ramirez pinaagi sa iyang 19 puntos, gisundan sa team owner niining si McLain Alkuino nga adunay 16 puntos.

Miiskor sab og double figures sila si Ashley Mendoza, Macmac Encarquez ug Dodee Endrina.

Sa kasamtangan, ang Harold’s Hotel maoy nag-una sa standing sa ilang 2-0 nga baraha, samtang ang Angel Mary Pawnshop adunay 1-1 record ning maong liga nga nahimo pinaagi sa paningkamot sa  

presidente niining si Dexter Caballero inabagan nilang Boy Atillo, Arnel Trinidad ug Baeng Medalle isip advisers.

Sa laing bahin, ang Micaela moharong sa defending champion Yoyi's Pastries & Dessert  karong alas-9 sa buntag ug sundan dayon sa duwa tali sa The Bros ug CRV sa alas-10 sa buntag.

PUNTOS MATAG USA

Unang duwa:

SOONTIT Cons. (102) – Manila 28, Caballero 24, Tabares 13, Laput 11, Trocio 11, Manalili 5, 

Macachor 4, Regudo 2.

NOAH (101) – Enriquez 25, Abella 14, Garcia 14, De Gracia 13, Atuel 12, Sabalande 7, Dechosa 4, 

Barro 2.

Ikaduhang duwa:

HAROLD’s Hotel (103) – Laborte 26, B. Endrina 21, Dacayanan 17, Jumantoc 12, B. Medalle 10, Ursal 6, 

Billones 6, Cabanes 3, Parba 2.

Angel Mary Pawnshop (93) – Ramirez 19, Alkuino 16, Mendoza 14, Encarquez 12, D. Endrina 10, 

Godofredo 7, Del Mar 4, Cabreros 2.