Noynay gibaharan sa kontra

CEBU, Philippines — Nagpanikad na ang Sugboanong kampiyon nga si Joe Marie ‘Jaw Breaker’ Noynay (13-2-1, 4KOs) nga modepensa sa iyang WBO Asia Pacific Youth super featherweight title batok ni Mexican challenger  Hector ‘Guadana’ Garcia (12-6-2, 7KOs) atubangan sa iyang mga katagilungsod karong Sabado sa gabii didto sa Don Celestino Martinez, Sr. Sports and Cultural Center sa dakbayan sa Bogo, amihanang bahin sa Sugbo.

Nagdumili hinuon si Noynay pagtagna og ‘knockout’ ug bugtong gisaad niini mao nga buhaton niya tanan kutob sa iyang mahimo aron dili mauwawan atubangan sa iyang mga kababayan sa main event sa “For Honor and Pride” fight card nga gipaluyohan sa Bogo LGU inabagan sa kagamhanan sa probinsiya sa Sugbo ubos sa liderato ni gobernador Hilario ‘Junjun’ Davide III, Cebu Provincial Sports Commission (CPSC) ug Elorde International Promotions.

“Excited kaayo ko kay gusto nako nga makakita ang ako mga kababayan sa ako dinuwaan ug ma-proud sila nako,” matud pa ni Noynay nga lumad gikan sa Barangay Nailon atol sa usa ka press conference kagahapon sa Rajah Park Hotel. “Importante sab kaayo nako ning awaya kay mao ni akong stepping stone para sa usa ka world title fight.”

Apan bisan og siya maoy inilog, si Noynay angayan gihapon nga magmatngon gumikan kay ang 23-anyos nga si Garcia dunay laing plano. Gani ang Mehikano mibahad nga patikangkangon niya ang garbo sa Sugbo sud sa unom ka hugna.

Tipik sa upat ka bulan nga preparasyon ni Garcia mao ang pakig-sparring ni kanhi world champion Hector Velasquez nga usa ka higayon nakontra ni Manny Pacquiao.

“Kun mao na ang iyang saad, ako dili lang ko mosaad og knockout. Dili ko mobuhi og katapusang sulti pero akong buhaton ang tanan para madepensaan nako ang akong bakus,” sumala pa ni Noynay  nga misakmit sa bakanteng WBO title human midaog pinaagi sa technical decision batok ni Jin Xiang Pan niadtong Disyembre 16 didto sa Zhongshan Sports Arena sa Zhongshan, China.