Donaire makigsinukmagay ni Frampton
CEBU, Philippines — Si four-division world champion Nonito ‘The Filipino Flash’ Donaire (38-4, 24KOs) mokatkat og balik sa ring karong Abril 12 diin iyang sangkaon si kanhi WBA super featherweight champion Carl Frampton (24-1, 14 KO) didto sa SSE Arena sa Belfast, Northern Ireland.
Usa ka super bantamweight, si Donaire katulo pa lamang makaaway isip featherweight.
Gipalukapa siya ni Nicholas Walters niadtong 2014, apan midaog batok nilang Simpiwe Vetyeka ug Ruben Garcia Hernandez.
Sa iyang bahin, si Frampton nakatilaw sa labing una ug bugtong pa lamang niyang pilde human nalangkatan sa iyang korona sa WBA sa Mehikanong si Leo Santa Cruz niadtong Enero 2017.
Nagkanayon si Frampton nga naghandom gyud siya nga moaway og balik alang sa usa ka world title ug himuon niyang hagdanan si Donaire aron pagkab-ot niini.
Apan angayan nga magmatngon si Frampton kay susama usab kaniya ang linyada sa huna-huna ni Donaire, nga mosuway pagpahumot og balik sa iyang pangan sa boksing.
“Frampton is someone that you cannot take lightly,” matud pa ni Donaire. “You have to be at 100% or there’s no turning back. I know there’s going to be boos and yelling here in Belfast at the fight, but I welcome that because that’s what support is all about! It will fuel me to be inspired.” (BANAT NEWS)
- Latest