Heat pinalakas ang tsansa sa playoff
MIAMI-- Handa ang Heat na harapin ang anumang ‘pressure’ sa hangaring makapasok sa NBA Playoffs.
“Our games matter right now,” sabi ni Fil-Am Heat coach Erik Spoelstra. “Let’s just rewind this to three months ago. They mattered to us then, but now we’re in a playoff chase, a hunt. As a competitor you want your team to feel all these emotions. So is there any more pressure? I don’t know. Bring it on. We want that.”
Umiskor si Dion Waiters ng 24 points at kumolekta si Goran Dragic ng 22 points at 10 assists para ilapit ang Heat sa isang playoff spot sa Eastern Conference matapos igupo ang Charlotte Hornets, 108-101.
Nagdagdag si Luke Babbitt ng 12 points at humakot si center Hassan Whiteside ng 10 points at 15 rebounds.
Tumipa ng 10 markers si James Johnson para sa Miami, nagtala ng 20-4 record sa kanilang huling 24 games na siyang naging NBA best record.
Kumamada ang Miami ng 27 points sa fourth quarter kumpara sa 15 markers ng Charlotte at nagsalpak ng kabuuang 17 three-point shots para sa kanilang panalo.
Pinamunuan ni Kemba Walker ang Hornets sa kanyang 33 points kasunod ang 16, 14 at 12 markers nina Nicolas Batum, Marvin Williams at Michael Kidd-Gilchrist, ayon sa pagkakasunod.
Sa Indianapolis, naglista si Paul George ng 13 sa kanyang 21 points sa third quarter para pamunuan ang Indiana Pacers sa 115-98 panalo laban sa Detroit Pistons.
Winalis ng Pacers ang kanilang four-game season series at nilampasan ng dalawang panalo ang Pistons sa kanilang agawan sa playoff seat.
Sa iba pang resulta, tinalo ng Orlando ang Chicago, 98-91; binigo ng Atlanta ang Brooklyn, 110-115; itinumba ng Milwaukee ang New York, 104-93; dinaig ng Toronto ang New Orleans, 94-87 at iginupo ng Utah ang Houston, 115-108.
- Latest
