Racela nahiubos sa mga reperi
CEBU, Philippines - Nahiubos si TNT KaTropa coach Nash Racela sa nakita niyang paghatag og pabor sa mga game officials sa ilang karibal San Miguel Beermen sa nagpadayong “best-of-seven” semifinals series sa PBA Philippine Cup.
Kahibalo si Racela nga dili angay mobuhi og pamahayag batok sa mga referees, apan wala na siya kapugong human sa nakita niyang dili makiangayong pagtratar sa mga officials ngadto kanila atol sa ilang 86-97 nga kapildihan sa Game- 4 niadtong Martes.
Nagtabla na karon ang serye sa 2-2 ug mabuak kini sa ilang panag-abot pag-usab karong gabii alang sa Game-5 didto sa Smart Araneta Coliseum.
Si Racela nagkanayon nga daghan og tawag batok kanila ilabi na sa mga krusyal nga bahin atol sa Game-4 nga maoy nakatampo sa ilang kapildihan. Menos usab ang tawag sa mga reperi ngadto sa mga magduduwa sa San Miguel.
Wala magpanagana si Racela sa pag-ingon nga matud pa gihatagan og 'special treatment' sa mga referees ang San Miguel tungod kay sila ang defending champion.
Dili na hinuon magpadala ang KaTropa sa maong isyu ug maningkamot na lang sila nga mobangon karon aron makuha ang 3-2 nga bentaha. Gusto usab nga mamawi karon ang sinaligan sa TNT nga si Jayson Castro human lang kini miiskor og 13 puntos sa Game-4. (BANAT NEWS)
- Latest