Baby Falcons, Bullpups sa Final Four

MANILA, Philippines - Sumikwat ng tiket sa Final Four ang Adamson University at nagdedepensang National University matapos talunin ang kanilang mga karibal sa UAAP Season 79 juniors basketball tournament kahapon sa Filoil Flying V Centre.

Kinuha ng Baby Falcons ang 77-59 panalo laban sa UP Integrated School, habang sinakmal ng Bullpups ang 63-52 tagumpay kontra sa De La Salle-Zobel.

Nagtuwang sina Encho Serrano at Gerry Abadiano sa kanilang pinagsamang 42 points para ibangon ang Adamson mula sa naunang 73-75 kabiguan sa Far Eastern University-Diliman.

Itinaas ng Baby Falcons ang kanilang baraha sa 8-1.

Umiskor naman sina Winderlich Coyoca at Karl Peñano ng 13 at 12 markers, ayon sa pagkakasunod, para ibigay sa NU ang 8-1 baraha.

Tinalo naman ng FEU-Diliman ang University of the East, 94-51, para sa kanilang 7-2 marka para sa ikatlong puwesto.

Samantala, binigo ng Ateneo ang University of Santo Tomas, 81-75, na nag-angat sa kanilang karta sa 5-4 para lumagay sa fourth spot.

Nalaglag ang Junior Maroons sa 3-6.