Batang Pinoy qualifying, CEPCA monthly chess gitakda
CEBU, Philippines - Magtakus na sab sa ilang abilidad ang mga bata nga hilig og duwang ahedres pinaagi sa Cebu chess qualifying alang sa 2016 Philippine Youth Games-Batang Pinoy National Championships karong weekend diha sa Robinsons Galleria Cebu.
Ang duwa sugdan sa alas-10:30 sa buntag. Ang duha ka adlaw nga torneyo maglangkob lamang og 13-under age group, apan dunay managlahing kategoriya sa mga babaye ug lalaki nga partisipante ubos sa standard rapid ug blitz format.
Si FIDE Arbiter Marvin Y. Ruelan nagkanayon nga ang nag-unang duha ka mananaog sa boys ug girls division maoy morepresentar sa Sugbo ngadto sa Batang Pinoy national finals nga gikatakda karong Nobiyembre 27 hangtod Disyembre 2 didto sa Tagum City, Davao del Norte.
Didto gihapon sa Robinsons Galleria, ang Oktubre nga edisyon sa Cebu Executives and Professionals Chess Association (CEPCA) monthly tournament banatan karong Domingo.
Ang opisyal sa CEPCA nga si Jun Olis nagkanayon nga gawas sa mga Cepcans, ila sab nga giimbitar ang mga tadhang babaye ug kiddie players aron pagdugang og kasadya sa ilang kalihukan.
Ang modaog sa group A ug B moabante ngadto sa grand finals nga gitawag sab og 'Battle of Champions' karong Disyembre.
Naglangkob sa sayong mga finalist sa group A mao sila si defending grand champion NM Rogelio Enriquez, Amado Olea, NM Arnold Cadiz, Peterson Sia, Rosendo Yamyamin, Carlo Maraat ug Jojo Muralla.
Samtang sa group B mao sila si Bong San Pascual, Romy Pialan, Ruel Hortelano, CEPCA President Jerry Maratas, Percival Fiel, Mario Bustillo, Richard Ouano, Jun Kidlat ug Manuel Abucay. (BANAT NEWS)
- Latest
