UV, Abellana kampiyon sa SBP Tatluhan

CEBU, Philippines - Ang University of the Visayas (UV) ug Abellana National School (ANS) maoy  mikampiyon sa tagsa-tagsa nila ka dibisyon sa SBP 3X3 Pambansang Under 16 Tatluhan Regional Finals sa miaging weekend didto sa Magis Eagles Arena sa Sacred Heart School- Ateneo de Cebu sa Canduman, Mandaue  City.

Ang UV misakmit sa titulo sa boys division human sila makaipsot sa Don Bosco Technology College, 12-10, samtang ang ANS milatos sa Carmen girls team, 19-7 alang sa korona.

Unang mipabuto sa ilang opensa ang Don Bosco ug milabaw sila og 4-0, apan wala mawad-i sa ilang konsentrasyon ang UV ug sa paningkamot nila ni Froiland Maglasang ug ZJ Enriquez natabla nila ang iskor, 8-all. Mipatuman og hugot nga depensa  ang  UV  ug  misaler kini ug nailog ang labaw.

Sakit kadto nga kapildihan sa Don Bosco tungod kay kadto ang bugtong nilang pilde sa torneyo human nila giharos ang elimination round, 6-0.

Sa girls division, ang ANS miratsada dayon aron ilubong ang Carmen, 10-2 sa sayong mga bahin sa duwa. Misuway og gukod ang Carmen, apan wala sila magsilbe sa init nga opensa sa ANS nga gipangulohan nila ni Florence Jil Talas ug Darliene Ragasajo nga nagkuboya’g 16 puntos. (BANAT NEWS)