Globalport mamimili kina Cardel, Gonzales

MANILA, Philippines – Pag-uusapan pa ng Globalport kung sino ang kanilang hihirangin bilang bagong head coach, habang pinalitan naman ni Ariel Vanguardia si Koy Banal bilang mentor ng Phoenix bago ang 2016 PBA Governor’s Cup.

Ilan sa mga pinagpipi­lian ng Batang Pier para sa posisyong naiwan ni Pido Jarencio ay sina Johnedel Cardel at Erick Gonzales.

“Wala pa. Pinag-uusapan pa lang,” sabi kahapon ni Globalport board representative Erick Arejola.

Si Jarencio ay hinirang na bagong head of basketball operations.

Umupo si Gonzales bilang interim coach ng Globalport noong 2015 PBA Philippine at Commissioner’s Cup nang mailuklok si Jarencio bilang team consultant.

Ibinalik ni team owner Mikee Romero si Jarencio bilang mentor at tinulungan ang prangkisa sa kanilang kauna-unahang semifinal appearance sa 2016 PBA Philippine Cup kung saan sinibak ng Globalport ang Barangay Ginebra sa isang ‘do-or-die’ quarterfinal playoff.

Iginiit naman nina Romero at Arejola na hindi nila pakakawalan sina guards Terrence Romeo at Stanley Pringle taliwas sa lumabas na report.