Dragons, Boomerangs naka-una sa E-League best of three semis
CEBU, Philippines – Ang Supportsave Dragons ug Telstra-Teletech Boomerangs maoy unang misalida sa best-of-three semifinals sa 11th CSCC E-League men's basketball tournament niadtong Sabado diha sa City Sports Club-Cebu gym.
Si Niño Belande miratsada og 32 puntos uban ang 15 ka rebounds aron pagtuboy sa Supportsave ngadto sa 77-70 nga kadaogan sa Author Solutions, Inc. Hardbacks, samtang si Sam Jordan Hermosa mikadlit og 26 puntos ug 15 ka rebounds aron pangulohan ang 69-67 nga pag-eskapo sa Telstra batok sa Kyocera Frontiers.
Gumikan niini, ang Supportsave ug Telstra nanginahanglan na lang og usa ka daog aron angkonon ang katungod nga maoy magsangka sa kampiyonato sa Evo League.
Si Belande, nga duna say upat ka assists ug tulo ka steals, gipaluyohan ni Germaine Jo Guarisma nga mitapos og 14 puntos uban ang pito ka rebounds, tulo ka steals ug duha ka assists. Dako sab og natampo si Gerald Mari Baritua sa iyang 11 puntos, lima ka rebounds, duha ka assists ug duha sab ka steals.
Sa iyang bahin, si Hermosa nakadawat og igong suporta gikan ni Brennan Gonzales nga miyagyag og 13 puntos, upat ka rebounds ug duha ka assists aron pag-agak sa Telstra ngadto sa kulbahinam nga daog batok sa Kyocera. (BANAT NEWS)
- Latest
