Duty Free-SM mikulit sa ikaduha nilang daog

CEBU, Philippines - Midaku  ang kahigayonan  sa  Duty  Free-SM nga moduwa sa championship human moiskor sa ilang ikaduhang daog sa nagkainit nga aksiyon sa 4th season sa Duty Free Sportsfest.

 Ang Duty Free-SM nakaipsot sa kulbahinam kaayo nga duwa batok sa Duty Free-Lahug, 43-41 niadtong Martes sa gabii didto sa Mabolo National High School Sports and Cultural Center, Cebu City.

 Ang 3-point buzzer beating ni Alzen Andales maoy naka-anghel sa Duty  Free-SM, apan si Alejandro Villaluz maoy nangu sa opensa sa iyang 11 puntos.

Gidominar sa Duty Free-SM ang duwa, apan nakurat na lang kini dihang nakalabaw ang Duty Free-Lahug, 41-40 sa nahabiling 11 segundos sa fourth quarter human sa 3-pointer  ni Jinyl Morante.  Modaog na unta ang Duty Free-Lahug dihang dos segundos na lang ang nahabiling oras sa duwa, apan si Andales mitusak sa iyang marka- bahala nga three point shot.

Si Carl Tajo maoy nangulo sa  Duty Free-Lahug pinaagi sa iyang nuybe puntos, lakip ang ‘back-to-back’ triples sa first period.

Sa laing aksiyon, ang Duty Free-Mactan miiskor sab og daog pinaagi sa pagdemolis sa Duty Free-Warehouse, 55-48 ubos sa pagpangulo ni Yo Nueneran  nga miratsada’g 15 puntos.

Ang Duty Free-Mactan nakapanemaho na sa ilang sayong kadaugan human  moposte og 40-24 nga bentaha sa fourth quarter nga maoy labing daku nilang labaw nga natala.

Bugtong konsolasyon sa Duty Free-Warehouse mao lang ang pagkitkit sa labaw ngadto na lang sa single digit.

Si Amber Cajes maoy nangu sa Duty Free Warehouse nga mihakot og 18 puntos, gisundan ni Miggy Cuttilar sa iyang 10 puntos.

Ang Duty Free-Mactan nagbitbit na karon og 1-1 win-loss record, samtang ang Duty Free-Warehouse adunay 0-2 nga baraha ning maong torneyo nga gipadagan nilang Ogie Cenabre ug Gani Tajo.

Puntos matag usa

Unang duwa:

 SM (43) – Villaluz 11, Galapin 8, M.  Bancale 7, Andales 5, Bancale 5, Nadela 4, Fontanar 3.

LAHUG  (41) – C. Tajo 9, Morante 8, Ebardo 8, Nayon 6, I. Tajo 2, Delos Reyes 2, Aningalan 2, Santisa 2 Evangelista 2.

Ikaduhang duwa:

MACTAN (55) – Nueneran 15, Arapan 8, George 8, Arriesgado 5, Paquibot 4, Malait 4, Villajos 4, Oroyan 3, Cinco 2.

WAREHOUSE (48) – Cajes 18, Cuttillar 10, Casquejo 9, Palang 4, Cero 3, Bangi 2, Comaingking 2. (BANAT NEWS)