Samsam gullas mikulit 4-0 sweep sa Emils’ Cup
CEBU, Philippines - Mipatigbabaw ang Samsam Gullas team batok sa Abrenica Engineering, 102-83 sa gubat sa duha ka wa’y pildeng koponan aron haruson og daog ang upat nilang ka duwa sa eliminasyon sa 8th Emil’s Fresh Chicken Fiesta Cup open basketball tournament didto sa Lipata Sports Complex sa Barangay Linao lungsod sa Minglanilla.
Gumikan niini, ang Samsam Gullas maoy miguwa nga top qualifier padung ngadto sa crossover semifinals.
Sa pagsulat ning balita gabii, ang mga batos ni coach Van Halen Parmis, ang giilang ‘Phil Jackson of Cebu’ isip usa sa mga winningest commercial coaches sa Visayas ug Mindanao region, nakigsangka pa batok sa RMA Logistics diin ang modaog moabante ngadto sa kampiyonato.
Ang Samsam Gullas team naglaraw nga tiwasan og pilde ang RMA nga ila nang gilabhan sa iskor nga 90-69 sa una nilang engkuwentro. Lain pang gibiktima sa Samsam Gullas team mao ang Aspa Scaffoldings, 89-79 ug ang SG-ARQ, 76-62.
Sa matag duwa sa Samsam Gullas team, mibida kanunay si Eliud Poligrates, ang beterano sa PBA diin nakaduwa siya og upat ka teams -- Talk ‘N Txt, Air 21, NLEX ug KIA.
Mi-average siya og 20 puntos matag duwa gawas sa maayo niyang pagtimon sa team inubanan sa mga makalingaw niyang mga lihok nga gikahimuot og maayo sa mga manan-away. (BANAT NEWS)
- Latest
