Casimero nag-train sa Las Vegas
CEBU, Philippines – Nalipay si former world champion nga si Johnriel ‘Cuadro Alas’ Casimero (21-2, 13KOs) sa iyang training didto sa Las Vegas tungod kay daku iyang pagtuo molambo ang iyang abilidad nga mohimo kaniya nga mas kusgan nga fighter.
“Lahi ra gyud ang training diri (Las Vegas). Nalipay ko kay nindot akong kondisyon ug mas nikusgan ko. Mag-train ko og maayo aron sab makita sa mga fans nga mas ni-improve ko,” matud pa ni Casimero, ang kanhi IBF light flyweight champ.
Si Casimero uban ang laing Pinoy boxer nga si Marvin 'Marvelous' Sonsona, kasamtangan nga nag-ensayo didto sa Roy Jones Jr. Fight Academy nga gipanag-iya ni former undisputed light heavyweight king Roy Jones Jr.
“Swerte kaayo nga naka-train ko sa gym sa akong idol (Jones Jr.). Nihatag siya’g mga tips ug miingon siya nga daku ko og potensyal,” dugang pa sa garbo sa Ormoc City.
Sila si Casimero ug Sonsona mipaubos karon sa mas scientific nga matang sa training uban ni Angel Heredia, ang nabantog nga conditioning coach nila ni Mexican legends Juan Manuel Marquez ug Jorge Arce.
Si Casimero padayong nagpaabot sa sunod niyang sangka. Siya ang ranked No.1 sa IBF nga mihimo kaniya nga mandatory challenger alang sa flyweight nga kasamtangang gihuptan ni Thai Amnat Ruenrueng.
Si Ruenrueng gikatakda na hinuon nga manalipod sa bakus sunod buwan batok ni Chinese boxing star Zou Shiming didto sa Macau. (BANAT NEWS)
- Latest
