World daog batok U.S.

CEBU, Philippines - Miburak og 22 puntos si Andrew Wiggins, samtang si Rudy Gobert mibahog og 18 puntos uban sa 12 ka rebounds ug tulo ka blocked shots aron tabangan ang World team pagpukan sa US, 121-112  sa Rising Stars Challenge sa All-Star weekend kagahapon didto sa Barclays Center sa Brooklyn.

Ang Canadian nga si Wiggins, kinsa maoy No. 1 pick ug nagduwa alang sa Minnesota Timberwolves maoy napiling MVP.

Ang Croatian sa Brooklyn Nets nga si  Bojan Bogdanovic, kinsa nagduwa sa iyang homecourt ug  ang taga-Montenegro nga si Nikola Mirotic sa Chicago Bulls parehong midugang og  16  puntos  alang sa World team.

Silang Victor Oladipo sa Orlando Magic ug si Zach LaVine sa Minnesota mipabuhagay  sab og 22 puntos matag usa aron pangulohan ang U.S. team sa usa ka sangka tali sa mga rookies ug mga second-year players.

Bag-ong format ang gigamit sa pagbukas sa All-Star weekend kagahapon diin maoy co-host ang New York ug Brooklyn.

Lahi sa mga nangagingRookies-Sophomores game, daghan kaayong nahitabo nga 1-on-1 play tali nilang Gobert, ang French center batok sa sentro sa Nets nga si Mason Plumlee sa uwahing bahin sa duwa.

Wala kaayo makahuygo si Oladipo, kinsa igo lang mihimo’g 8 for 21.

Ang taga Senegal nga si Gorgue Dieng sa Minnesota, miamot og 14 puntos alang sa World, samtang silang Dennis Schroder sa Chicago  ug Giannis Antetokounmpo sa Greece nga nagduwa sa Milwaukee Bucks mihimo’g 13  ug 12  puntos matag usa.

Milangkat sab og 10 ka rebounds alang sa World si  Antetokounmpo, kinsa mosalmot karon sa slam dunk contest batok nilang LaVine, Oladipo ug Plumlee.

Ang player sa Utah Jazz nga si Trey Burke miamot og 17 puntos alang sa U.S samtang sila si  Plumlee ug Cody Zeller adunay  13 ug 12 puntos matag usa.  (BANAT NEWS)

Puntos matag usa

WORLD (121) –  Wiggins 22, Gobert `18, Bogdanovic 16, Mirotic 16, Dieng 14, Schroder 13, Antetokounmpo 12, Dellavedoa 4, Exum 4, Papanikolaou 2.

   U.S. (112) – Oladipo 22, LaVine 22, Burke 17, Plumlee 13, Zeller 12, Muhammad 10, Caldwell-Pope 8, Noel 4, Payton 2, Covington 2, Williams 2.