Baby Panthers miangkon sa ikatulong puwesto

CEBU, Philippines – Miposa’g 25 puntos si John Brylle Bahio  aron pangulohan  ang University of Southern Philippines Foundation (USPF) Baby Panthers ngadto sa 83-72 nga kadaugan batok sa Cebu Institute of Technology-University (CIT-U) Wildkittens, ingon man sakmiton ang ikatulong puwesto sa juniors division sa  14th Cebu Schools Athletic Foundation, Inc. (CESAFI) basketball tournament kagahapon didto sa Cebu Coliseum.

Medyo nagkainitay ang Baby Panthers ug ang Wildkittens  sa maong duwa diin gitawgan og unsportsmanlike fouls silang Jeroel Pedrosa ug Justin Julens Langres, apan wala hinuon kini moresulta ngadto sa kagubot.

Naglisud pagpugong ang Wildkittens kang Bahio, samtang nakatampo  sab sa opensa  silang Ain Obenza, Carl Carbajosa, Dennis Archival ug Clyde Drexley Avancena nga pulos miiskor og double figures alang sa Baby Panthers.

Gi-award dayon ngadto sa Baby Panthers ang thrid place trophy human sa duwa pinangulohan ni commissioner Felix O. Tiukinhoy  Jr.

Didto na magsugod og labaw og daku ang Baby Panthers sa second half human ilang gipapas ang 38-32 nga labaw sa  Wildkitens sa halftime.

Ang kinadak-ang labaw sa Baby Panthers miabot og 15 puntos, 70-55 sa nahabiling singko minutos  sa duwa.

Si Langres, kinsa maoy sinaligan sa Wildkittens mihakot og 15 puntos,  samtang  silang Vince Bradley Hapin ug Joshua Manatad  parehong adunay 14 puntos. Silang  Kevin Plaza ug Jasper Berezo  miabuno’g 12 ug 10 puntos matag usa.

Ning pagsuwat, padayon pang nagduwa ang Sacred Heart  School-Ateneo de Cebu (SHS-AdC) Magis Eagles batok sa University of the Visayas (UV) Baby Lancers sa Game-1 sa best-of-three finals. (BANAT NEWS)