Julikan-2 mikulit 2-0 nga baraha

CEBU, Philippines -  Gitinuod gyud sa Julikan-2 ang ilang saad nga moiskor sa ikaduha nilang sunod-sunod nga daog pinaagi sa pagpilde sa Sunday Selection, 88-77 sa 40-above division sa 4th Palarong Pambarangay Inter-Sitio basketball tournament niadtong Martes sa gabii diha sa Telof Plaza basketball court sa barangay Subangdaku, dakbayan sa Mandaue.

Sama sa una nilang duwa, ang Julikan-2 mao gihapon ang mikontrolar sa kinatibuk-ang aksiyon, apan ning higayona si Ramil ‘The Assasin’ Getigan maoy mikiat og maayo diin mikubkob siya’g 14 puntos aron pangulohan ang kadaugan.

Wala kaayo maka-arte ang tandem nilang Ritchie Tecson ug Dodod Colina diin igo lang silang nagkumboya’g 17 puntos.

Human moposte’g 43-32 sa halftime, ang Julikan-2 nilang Julius ug Ric ‘Jecko’ Ruelan walay hunong nga mikuykoy og mga puntos sa nahabiling duha ka kuwarter aron bingaton pa ang ilang labaw ngadto na sa 21 puntos, 71-50 human sa basket ni Hanzel Fick sa sayong bahin sa final period.

Misalida sab si Ruben Flores, gawas sa iyang nuybe puntos, midominar sab siya sa rebounding uban nilang Amay Dy ug Barkley Gabison

Bugtong paglaum sa Sunday Selection mao ang pagtipak sa dakung labaw sa Julikan-2 ngadto na lang sa single digit, 77-86 kortesiya sa walo ka sunod-sunod nga puntos ni Eddie Rico diin unom niini gikan sa “back-to-back” triples.

Si Reynaldo ‘Naldo’ Ybañez mao lang ang bugtong scorer sa Sunday Selection nga naka-double figures nga mirehistro’g 19 puntos diin 15 niini iyang nakutlo sa first half.

PUNTOS MATAG USA

JULIKAN-2 (88) – Getigan 14, Tecson 9, Flores 9, Colina 8, Plazo 8, Anton 7, Gonzaga 7, Abordo 6, Supangan 6, L. Mah 6, Dy 4, Fick 4, Santome 2, Gabison 2.

SUNDAY SELECTION (77) – Ybañez 19, E. Rico 8, Aposaga 8, Rosaroso 7, Anghay 6, C. Rico 6, Sinadjan 6, Medio 5, Labastida 4, R. Rico 4, Migallen 3, Savequilla 2.