Mary Ann Shaw nakaikyas sa 4th Palarong Pambarangay

CEBU, Philippines - Nakuha gyud sa Mary Ann Shaw ang makutas nga kadaugan batok sa San Juan, 61-60 aron magpabiling walay pilde sa midget division sa Subangdaku 4th Palarong Pambarangay Inter-sitio 2014 basketball tournament niadtong Martes sa gabii diha sa Telof Plaza basketball court sa Brgy. Subangdaku, Mandaue City.

Ang “Triple J” sa Mary Ann Shaw maoy bida sa kadaugan nga parehong mihimo’g double figures. Si Joshua Seno mikadlit og 16 puntos, gisundan ni Joseph Santome nga mitikdol og 13 puntos, samtang si John Lloyd Dizon mitimang og 11 puntos alang sa Mary Ann Shaw nga kanunay’ng naggukod gikan sa pagsugod hangtod na sa katapusang dos minutos sa duwa.

Nadasig kaayo ang mga players sa Mary Ann Shaw tungod sa presensiya sa ilang team owner nga si Mary Ann Colina Shaw, kinsa personal nga misaksi aron mohatag sa iyang moral support. Si Shaw usa ka rehistradong nurse ug didto nagtrabaho sa Kaiser Hospital sa Sacramento, California.

Gawas sa basketbol, si  Shaw aktibo sab nga misuporta sa mga feeding program sa barangay Subangdaku pinaagi ni Brgy. Capt. Ernie Manatad.

Sa kasamtangan, ang Mary  Ann Shaw ni team owners Mila Colina ug Jackie Colina nagbitbit na og 3-0 nga baraha ning tinuig nga liga nga gipadagan ni konsehal Rene Tecson, ang chairman on sports uban sa mga technical committees nga silang Dodod  Colina, Ritchie Tecson, Eric Plazo ug Ashlee James Cortes. Mihatag sab sa ilang serbisyo silang Benjamin Jamili, Marlon Tutoy ug Mark Christopher Maloloy-on. (Yoyo R. Abayan)

puntos matag usa

MARY ANN SHAW (61) – Seno 16, Santome 13, Dizon 11, Estera 5, Magano 2, D. Tecson 2, Rondina 2, Saberon 2, Plazo 2, N. Colina 2, L. Colina 2, T. Tecson 1, Baruc 1.

SAN JUAN (60) – Macasero 17, Saraum 7, Cantan 6, Rosatase 6, Aguinaldo 6, Cosrojas 3, Aguinaldo 2, Pitogo 2, Suan 2, Fuentes 1. (BANAT NEWS)