Pimentel Brokers mobalik og duwa
CEBU, Philippines - Human molampos sa ilang pagdepensa sa titulo sa miaging 2nd BOC-CIPU Fellowship Cup basketball tournament, mopahuway una sa makadiyot ang MJDL Brokers kinsa nakatigum na og upat ka championship trophies sa lain-laing torneyo nga ilang gisalmotan.
Matod pa sa MJDL team leader nga si Noel Medalle, magpalabay una'g pipila ka tuig ang MJDL ug ang bulahan nga nabinlan sa lig-on nga team mao ang Pimentel Brokers ni Marty Pimentel.
Mitug-an si Medalle sa Banat Sports nga kumpirmado na ang pagbalhin sa mga players gikan sa MJDL jerseys ngadto na sa MP jerseys atol sa ilang 3rd season karong Agosto.
Taud-taud nang wala mosalmot ang Pimentel sa torneyo nga gidumala sa mga Customs Brokers ug sa ilang mga personeros tungod kay dili makasugakud ang ilang mga players apan karon nga dunay gihimong transition o pagpasa ang MJDL, hipanglantawan nang daan ni Marty nga makatilaw na gyud siya og kampiyonato.
Kataposan silang misalmot og torneyo didto pa sa Cogon-Ramos gym diin sila maoy third placer.
Midaug ang MJDL sa ilang ikaduhang titulo sa BOC-CIPU batok sa Ynah Brokers, 97-79 niadtong Hunyo 26 didto sa barangay Tinago gym.
Kumpleto lang gihapon ang tibuok team nga magdala sa team nga MP Brokers ug lakip na niini ang ilang coach nga si Caleb Gawangon. (BANAT PALARO)
- Latest
