Managsuong pagara mosulong sa maasin
CEBU, Philippines - Managsuong Jason ug Albert Pagara, ang masidlakon nga managsuong boksidor ang moaway sa usa ka fight card sa ALA Stars Provincial tours sa Abril 11 didto sa ilang lugar sa Maasin City gymnasium sa Southern Leyte.
Sila si Jason (32-2, 19KOs) ug Albert (19-0, 13KOs), kinsa pulos adunay winning streak moharong sa tagsa-tagsa nila ka wala pa hinganling Asyanong mga kaatbang.
"It’s a big boxing event because this is the first time that the Pagara brothers will be fighting in Maasin City," matud pa ni ALA Promotions President and CEO Michael Aldeguer.
Ang WBO International light welterweight champion nga si Jason mohimo sa iyang tune-up fight sa maong event isip preparasyon sa mas daku niyang sangka sa main event sa Pinoy Pride card didto sa Dubai unya sa Hunyo.
Ang 25-anyos nga si Jason midaog sa katapusang lima niya ka away nga gitapos sa usa ka dominanteng unanimous decision nga kadaugan batok ni Vladimir Baez sa Dominican Republic niadtong Nobiyembre 30 didto sa Smart Araneta Coliseum.
"We’ve got to understand that Jason is in a very tough division (140 lbs.) and that is why he needs more exposure especially fights abroad. After his Dubai fight, we are planning to send him to the United States to train," sumala pa ni Aldeguer.
Sa iyang bahin, si Albert nga lab-as pa gikan sa iyang first round KO nga kadaugan batok ni Indonesian Isaack Junior niadtong Marso 1 didto sa Solaire Resorts and Casino sa kaulohan, laraw nga moiskor og laing impresibong daog aron makuha ang regional title shot.
Kini ang ikaduhang higayon nga moaway ang duha ka Pagara sa usa ka fight card. Niadtong Agosto, 2012, sila si Jason ug Albert pulos midaog pinaagi sa knockout sa Pinoy Pride XV. Si Jason mikulata ni Mexican Rosbel Montoya, samtang si Albert midaog sab batok ni Alvin Makiling sa undercard. (BANAT PALARO)
- Latest
