Simple likes ug Pimentel mag-ilog sa korona

CEBU, Philippines - Gipukan sa Simple Likes Resto Bar ang Angel Mary Pawnshop sa ilang knockout match kaniadtong Miyerkoles pinaagi sa pagkulit og kulba-hinam kaayong 133-130 nga kadaugan nga milanat og singko minutos nga overtime aron mo-abante sa finals sa 7th season sa FYA-Philip Zafra Cup basketball tournament didto sa barangay Tisa gym, ning dakbayan.

Tungod sa maong kadaugan, nasakmit sa Simple Likes ni playing coach Noel Medalle ang ikaduhang luna sa finals ug maoy makigsangka batok sa Pimentel Brokers karong gabii sa usa ka knockout match.

Dili na unta molanat ngadto sa overtime ang maong duwa tungod kay naglabaw na ang Simple Likes ug tres puntos, 110-107 human sa duha ka free throws ni Medalle sa kataposang 10.9 segundos.

Apan gipabayad sa Angel Mary ang simple Likes kinsa miluag sa ilang depensa ug gitirahan sila ni McLean Alkuino kinsa nakapasulod og three-pointer sa nahibiling 4.9 segundos aron tablahon ang duwa ug nakapugos og overtime human mosipyat ang Simple Likes sa ilang kataposang ball possession sa iskor, 110-all.

Didto sa overtime gipamatud-an sa Simple Likes ang ilang katakos ug wala sila magpadaug sa pressure bisan kanunay mosikit ang Angel Mary.

Gidabo-dabohan sa Simple Likes ang Angel Mary didto sa free throw diin didto magligas og dako--21-3 sa free throw points sa overtime.

Pito ka free throws sa overtime ang gikan kang Medalle, unom kang Louie Baricuatro, upat kang Ryan Dacayana ug tagurha gikan nilang Victor Lastomen ug Isyut Regudo.

Ang Angel Mary maoy makigsangka batok sa D&L Sportswear alang sa ikatulong pwesto.

Si Medalle maoy nangu sa Simple Likes sa iyang 27 puntos ug parehong miposa og 20 puntos matag usa silang Dacayana ug Lastomen.

Laing upat ka teammates ang miamot sab ug double figures nga silang Baricuatro (18), Misasol (16), Regudo (13), ug Wendell Abella 10.

Ang Angel Mary gipangulohan ni McLean Alkuino kinsa miburak og 34 puntos samtang si Reniel Lim midugang og 25 puntos ug silang Jayson Ramirez ug Jim Rara midugang og 17 ug 11 puntos, matag usa.

Puntos matag usa:

Simple Likes (133)— Medalle 27, Dacayana 20, Lastomen 20, Baricuatro 18, Mirasol 16, Regudo 13, Abella 10, Zapanta 4, Canceko 3, Sarsaba 2.

Angel Mary (130)— Alkuino 34, Lim 25, Ramirez 17, Rara 11, Sydiongco 9, Cajocson 8, Baguio 7, Jabonero 5, Dumaguit 4, Paba 2. (BANAT NEWS)