Road Warriors Ibinaon pa ang Gems

MANILA, Philippines - Pinag-alab nina Garvo Lanete, Kevin Alas at Matt Ganuelas ang opensa ng NLEX mula sa pangala­wang yugto upang ikasa ang 80-68 panalo sa Cebuana Lhuilliler sa PBA D-League Aspirants’ Cup kahapon sa JCSGO gym.

Si Lanete uli ang na­ngu­na sa Road  Warriors sa kanyang 21 puntos habang 18 at 13 ang isinuporta nina Alas at Ganuelas at ang tropa ni coach Boyet Fernandez ay nanalo sa ika-siyam na pagkakataon sa 10 laro para lumapit pa sa asam na malagay sa unang dalawang puwesto na aabante agad sa semifinals.

“I’m happy that my pla­yers continue to play with a lot of energy,” pahayag ni Fernandez.

Matapos ang tres ni James Martirez para maitabla ng Gems ang iskor sa 28, gumanti si Lanete ng sariling three-pointer habang si Ganuelas ay may apat para kunin ng NLEX ang 39-28 kalamangan sa halftime.

Pumukol pa ng tig-isang tres sina Lanete at Alas sa ikatlong yugto para palobohin ang kalamangan sa 19, 67-48.

Ikalawang sunod na ka­biguan ito para sa  Gems na nalagay sa ala­nganin ang hinahangad na umabante sa quarterfinals sa 4-6 karta.

Hindi naman nakaapekto ang mahigit isang buwan na pamamahinga ng Cagayan Valley sa pa­­mamagitan ng 101-92 ta­gumpay laban sa NU-Banco de Oro sa unang laro.

Tig-isang triples ang ibinigay nina Don Trollano at Adrian Celada upang tapatan ang magkasunod ding tres nina Jet Rosario at Robin Rono at makakalas mula sa 91-90 iskor.