Angel Mary Pawnshop pabiling way pilde

CEBU, Philippines -  Wala pa gihapon mabulingi ang kaputli sa Angel Mary Pawnshop human sila modaog batok sa Harold’s Hotel, 105-100  sa   7th  F. Llamas Youth Association (FYA) 2013 Philip Zafra Cup didto sa Brgy. Tisa gym niadtong Lunes.

 Sa laing duwa, nakadagit   sab og daog ang D&L Sportswear batok sa BD Law Office, 94-85 alang sa 1-1 nga baraha.
 Ang 3-0 nga Angel Mary gipangulohan ni Jayson Ramirez kinsa mibubo og 22 puntos samtang sila si McLean Alkuino ug Lito Bermudez nagkumboya'g 25 puntos ug silang Reinel Lim ug Bobong Jabonero miamot og 11 puntos matag usa.
 Ang Harold’s Hotel kinsa nahiagom sa ilang ikaduhang sagunson nga pilde (0-2) gipangulohan ni Beking Rollon sa iyang 27 puntos, apan wala makaduwa si Dandan Enriquez.
 Sa laing bahin, si Dondon Cadungog miposa'g 20 puntos  aron pangulohan ang D&L. Si  Ryan Villaver mitimbre'g 16 puntos sa maong kadaugan.
 Nagpatuyang og pamuntos si USC Baby Warriors coach Britt Carlo Reroma diin mibahog siya og 35 puntos, apan wala kini makapadaog sa BD Law Office  nga nagbitbit og 0-2.

PUNTOS MATAG USA

Unang duwa:
 Angel Mary Pawshop (105) - Ramirez 22, Alkuino 13, Bermudez 12, Lim 11, Jabonero 11, Sydiongco 9, Rara 8, Dumaguit 7, Cajucson 7, Parba 3, Pardenilla 2.
 Harold’s Hotel (100) - Rollon 27, Lavandero 20, Cal 15, Lopez 15, Masongsong 13, Dudalo 6, Antiporta 3, Haincanto 1.
Ikaduhang duwa:
 D&L Sportswear (94) - Cadungog 20, Villaver 16, Pacaña 12, Dacayana 10, Torres 8, Abella 6, Trangia 4, Parba 4, Batuto 2.
 BD Law Office (89) - Reroma 35, Sabalande 18, Avila 11, Cabañes 7, Garcia 6, Medalle 5, Abella 4, Banzon 4, Cueme 4.  (BANAT PALARO)