CEBU, Philippines - Walo ka koponan ang magkumbati sa Cebu Schools Athletic Foundation Inc. (CESAFI) beach volleyball event nga mosikad karong adlawa diha sa Southwestern University (SWU) sand courts.
Lima ang mopakita'g aksiyon sa men's division, samtang tulo sa women's category.
Ang koponan nga mosuway pagsakmit sa dungog mao ang defending champion SWU, University of Southern Philippines Foundation (USPF), University of the Visayas (UV), University of San Jose-Recoletos (USJ-R) ug Cebu Institute of Technology- University (CIT-U).
Mag-ilog sa korona sa women's division mao ang USPF, SWU ug ang USJ-R.
Ang torneyo ipaagi og single round robin format sa elimination. Ang top four teams nga adunay labing nindot nga rekord moduwa sa cross-over semifinals. Ang modaog maoy moduwa sa finals.
Ang women's division ipaagi sa double-round robin diin ang top two teams moabante sa kampiyonato.
Ang top performers sa torneyo maoy morepresentar sa Cebu alang sa Private Schools Athletic Association (PRISAA) Regional Games sunod tuig. (BANAT NEWS)