2nd CSCRO-7 Fun Run mobukas sa 113th PcS anniversary
CEBU, Philippines - Agi'g pagsaulog sa 113th nga anibersaryo sa Philippine Civil Service karong Septiyembre, ang Civil Service Commission (CSC) Regional Office 7 mopahigayon sa ilang ikaduhang fun run karong Septiyembre 7 diha sa Central Command sa Camp Lapulapu sa Lahug.
Ubos sa tema "2nd CSCRO 7 Fun Run - Run for Efficient and Better Public Service" ang fun run sugdan sa alas-5 sa buntag.
Matud pa ni Prolaine D. Daclan, ang Chief Personnel Specialist sa Civil Service Regional Office 7 nga ang kita sa maong fun run adto padulong sa Pondong Pamanang Lingkod Bayan Program aron sa paghatag og pasidungog sa mga opisyal sa kagamhanan nga namatay atol sa ilang panerbisyo sa katungdanan.
Ang fun run bukas sa tanang Filipino citizens nga nagpangedaron og 18-anyos pataas. Ang runners nga ubos sa 18-anyos mahimong makadagan kun aduna kini parental o guardian's consent.
Ang registration sa walay singlet nagkantidad og P150, samtang P300 alang niadtong gustong makaangkon og singlet. Ang registration hangtod lang sa Septiyembre 5, 2013.
Ang mga entrante adunay duha ka kategoriya nga pilian - 7K ug 3K runs.
Ganting salapi ang nagpaabot sa mga mananaog sa duha ka kategoriya diin ang top three finishers sa 7K lalaki ug babaye makadawat og P4,000, P3,000 ug P2,000. Ang top three sa 3K lalaki ug babaye makaangkon og P3,000, P2,000 ug P1,000.
Alang sa dugang nga kasayoran, mahimong motawag sa Civil Service Commission sa mga numero 414- 7646 ug 414-7488 ug pangitaa si Guendolyn P. Lloren ug Rachel C. Jaluag o email sa [email protected].
- Latest
