UV vs. CIT-U
CEBU, Philippines - Buot pang modaginot og daog ang University of the Visayas (UV) Green Lancers sa ilang katapusan duwa sa elimination round sa pagpadayon sa 13th Cebu Schools Athletic Foundation Inc. (CESAFI) basketball event karong gabii diha sa Cebu Coliseum.
Ang UV Green Lancers nga nagtinguha molingkod sa ikaduhang puwesto sa standing makigsangka sa Cebu Institute of Technology-University (CIT-U) Wildcats sa main game sa alas 6:45 sa gabii.
Sa dili pa ang ilang duwa, magsangka una ang University of Southern Philippines Foundation (USPF) Baby Panthers ug Cebu Eastern College (CEC) Dragons sa alas-5 sa hapon.
Layo ra ang posibilidad nga masugamak na sab ang UV Green Lancers tungod sa ilang duha ka imports nga naghatag kanila'g mas dakung bentaha batok sa CIT-U Wildcats.
Bugtong ang Southwestern University (SWU) Cobras lang ang nakapilde sa Lancers, kinsa tinguhang mopugnit og 5-1 nga baraha human sa eliminasyon. Ang Cobras mao na lang ang team nga wala pa makatilaw og pilde sud sa lima ka duwa.
Samtang nagkaduol na silang motapos isip No. 2 seed, mahimo nang dili kaayo hatagan og taas nga playing time ang ilang imports nga silang Steve Cedrick Akomo ug Mike Harry Nzesseu aron makapahuway alang sa quarterfinals sunod semana.
Sa laing bahin, ang University of Cebu (UC) Webmasters miihaw sa USPF Panthers, 80-67 alang sa ilang unang daog niadtong Martes sa gabii.
Daku ang kompiyansa ni Webmasters coach Roel Gomez nga moabante ngadto sa semifinals karon nga nakasuway na sila'g daog.
Sa pagka karon, ang Webmasters nagbitbit og 1-3 nga baraha, samtang ang ilang biktima nga Panthers wala pa makatukob og daog sa upat nila ka duwa.
Ang anak ni coach Gomez nga si Arvin Kim ug ang bigman nga si Kenneth Niones maoy nangulo sa Webmasters nga mibahog og 20 puntos matag usa, samtang si Jan Michael Auditor midugang og 10 puntos.
Sa pikas bahin, ang Panthers gipangulohan sab ni Art Camello, kinsa miburak og 18 puntos, gisundan nilang Michael Smith ug Ervin Badrina nga adunay 11 puntos matag usa. (BANAT NEWS)
- Latest
