Sugod na duwa sa 18th Milo Olympics

CEBU, Philippines -  Pormal na sugdan ang aksiyon sa 18th Milo Little Olympics Visayas Regional Finals sa managlahing binyu nga kasagaran niini anha ipahigayon sa Cebu City Sports  Center diin ang medal-rich athletics ug swimming ug ingon man ang secondary gymnastics, scrabble ug taekwondo.

 Ang basketbol nga gilakip sa labing unang higayon sa tinuig  nga kompetisyon nga gipaluyohan sa Nestle Philippines, duwaon sa lima ka mga binyu tungod sa daghang numero sa mga entrante.

 Adto kini duwaon sa Capitol Parish gym, Sacred Heart School, Cebu Eastern College, University of the  Visayas  ug Cebu  Coliseum.

 Ang badminton duwaon sa Metro Sports, ang chess sa USC-South Campus, elementary football sa Aboitiz Sports Field, lawn tennis sa Baseline Recreation Center (elementary) ug sa Alta Vista Golf and Country Club (secondary), sipa ug sepak takraw sa Labangon Elementary School, table tennis sa University of Cebu (UC) ug volleyball sa Sacred Heart  School,  Southwestern University, Cebu Technological University ug Zapatera Elementary School.

 Dul-an sa 6,000 ka mga atleta gikan sa 280 ka tunghaan sa rehiyon ang mopakita'g aksiyon sa duha ka weekend nga kompetisyon.

 Ang perennial champion University of Cebu (UC) mao gihapon ang paborito nga mohawod sa secondary division.

 Lain pang eskwelahan nga angay tan-awon mao ang gymnastics power University of the Visayas (UV)-main campus, USC-Basic Education Department, Abellana National School, Southwestern University, University of Southern Phlippines Foundation (USPF), Sacred Heart  School-Ateneo de Cebu (SHS-AdC) ug  Cabancalan National School.

 Angay sab nga mangandam ang Cebuano athletes sa lisud nga hagit gikan sa Iloilo National High School ug Silliman University sa Dumaguete City nga pulos nasulod sa top 10.

 Lain pang lig-on contender naglakip sa  Catmon Elementary School, Cebu Institute of Technology-University, University of San Jose-Recoletos, Don Bosco Technology Center, Talamban Elementary School, Banilad Elementary School-Mandaue, Labangon Elementary School ug University of Bohol. (BANAT PALARO)