Pink mipilde sa Green sa Sunday Club

 CEBU, Philippines -  Mipakita sa iyang talagsaong duwa si businessman ug sportsman Rolly dela Pieza aron pangulohan ang Pink team pagpukan sa Green team, 101-93 sa  Phase 3 Camella Homes  Sunday Club basketball tournament niadtong Domingo didto sa Villas Magallanes gym sa Lapu-Lapu  City.
 Walay bisan usa ka magduduwa sa Green team ang nakapugong sa pagmangtas ni Dela Pieza, kinsa mipuga sa tanan  niyang  tinagoan  nga  katakus aron moiskor og 26 puntos.
 Aduna unta'y nangahas sa  pagpugong ni Dela Pieza, apan pakyas kini gumikan sa kaidlas niini, kinsa yano kaayong mipatuasik og mga puntos aron pangulohan ang kadaugan.
 Nabitin ang Pink team sa unang-duha ka kuwarter diin gibiyaan kini og 10 puntos sa halftime, 41-51.
 Hinay-hinay nga migukod ang Pink team sa third quarter ug ilang na-outscore ang Green, 27-15 aron moposte og dos puntos nga bentaha, 68-66 paingon sa fourth period.
 Si Pompy Ngujo nakatabang sab og daku sa maong kadaugan dihang milaksi kini og 24 puntos, samtang silang Bebot Pleños ug Edwin Amistad miamot og 14 puntos matag usa alang sa Pink team.
 Ang Green team nga wala na makabangon sa second half, gipangulohan ni Roilan Sumilang, kinsa mihabwa og 23 puntos, gisundan ni Allan Sepe nga adunay 14 puntos.
 Laing tulo ang mimarka og double figures alang sa pilderong Green team.

PUNTOS MATAG USA

 PINK (101) - Dela Pieza 26, Ngujo 24, Pleños 14, Amistad 14, Villanil 9, Brañanola 4, Caro 2
 GREEN (93) - Sumilang 23, Sepe 14, Igot 13, Cortez 12, Almacin 10, Geraldez 7  (BANAT SPORTS)