Kano nga coach mohimo'g clinics dinhi sa sugbo

CEBU, Philippines - Ang Amerikanong coach nga si Ryan Goodson gikatakdang mobisita dinhi sa Sugbo karong Oktubre aron mopahigayon og usa ka semanang skills training sa mga interesadong mokat-on og basketball labot niini ang mga lalaki ug babaye nga nagtungha sa high school.

Si Goodson maoy founder sa Goodson Basketball Pro Skills Academy. Gawas pa sa iyang pro skills coach, usa sab siya ka author sa librong "Advanced Ball Handling" ug siya maoy DVD director sa Stephen Curry Academy. 

Laing malamposong estudyante ni Goodson mao si Chris Paul, usa ka All-star point guard sa Los Angeles Clippers ug sakop sa Team USA kinsa nagduwa karon sa nagpadayong 2012 London Olympics.

Nakauban sab si Goodson sa NBA Skills Coach nga si Ganon Baker.

Atol sa pito ka adlaw nga clinics, si Goodson mopahigayon og skills academy curriculum kalabot sa intense pro workout, NBA moves and concepts, 2 and 3 ball dribbling drills, advanced shooting drills, position work, strength and conditioning drills ug passing versus pressure.

Tungod sa iyang abilidad, si Goodson gidapit na sab pagpahigayon og clinics didto sa Europe ug sa Canada.

Muabot si Goodson dinhi sa Sugbo unya sa Oktubre 13 apan sugdan ang clinics unya pa sa Oktubre 16. Sa kasamtangan, wala pa matino ang benyu alang sa clinics.

Gidapit kung kinsa kadtong mga gustong mosalmot sa clinics ni Goodson sa pagbayad og registration fee nga P3,500 sulod sa usa ka semana ug libre na ang t-shirt ug certificates of attendance nga adunay pirma ni Goodson.

 Ang coordinator sa maong clinics dinhi sa Sugbo mao si Michael T. Cena ug makontak siya sa iyang mobile phone numbers 09304669330.

Ang maong clinics limitado lang sa ubang 25 ka mga players ug ang tanang mosalmot giawhag sa pagdala og kaugalingong basketball nga maoy gamiton sa training.

Si Goodson ma-kontak sa iyang email sa [email protected]. Ang iyang website http://www.goodsonbasketball.com/.

Ang iyang mga drills makita sa www.youtube.com/ryangoodson23.

Isip pagpamatuod sa abilidad ni Goodson kalabot sa iyang mga drills, si Buzz Peterson, ang head coach sa men's basketball sa University of North Carolina Wilmington nagkanayon nga "Ryan's ball handling drills are the best I've witnessed by any individual." Samtang si Houston Fancher, ang assistant coach sa University of Tennessee nag-ingon nga "Ryan is as dedicated to his craft as any trainer I've ever been associated with on the collegiate level."