CEBU, Philippines - Mitusak og tulo ka 3-pointers si Francisco Arong, lakip na ang go-ahead triple alang sa Prime Asia/UV Lancers nga miharos sa Kia Motors/CIT-U Wildcats sa ilang "best-of-five" finals uban ang 84-79 nga kadaugan sa Game-3 aron sakmiton ang kampiyonato sa 6th CESAFI Partner's Cup kagabii didto sa Cebu Coliseum.
Ikaduha kining sunod-sunod nga championship sa UV Green Lancers ug sa ilang head coach nga si Felix 'Donbel' Belano Jr. dihang sila sab ang nidaog sa korona sa miaging tuig dihang ang Lion Tiger Katol pa ang ilang corporate backer. Ang Lion Tiger gibitoonan karon sa USJ-R Jaguars, nga napakyas pag-abante sa finals karon nga season human maligsi sa Kia Motors sa semis.
Ang ikatulong three-pointer ni Arong naghatag sa Prime Asia og 68-66 nga bentaha, samtang si Phil Mercader mitusak og laing three-pointer aron inaton ang labaw, 71-66 sa katapusang dos minutos sa duwa.
Si Mercader miiskor lang og otso puntos, apan ang iyang duha ka 3-pointers nakatampo og daku. Ang una niyang triple maoy nakapatilaw sa Prime Asia sa labing daku nilang labaw nga 13 puntos, 59-46 sa nahabiling 18 segundos sa third period.
Ang Kia Motors, kinsa niduwa nga wala ang ilang head coach nga si Gilbert Demapa, mihulga sa katapusang higayon, 68-71 kay ang Prime Asia walay hunong nga mipupo og mga puntos alang sa ilang otso puntos nga kadaugan.
Si Arong mikutlo og 18 puntos, apan ang sentro nga si Wowie Escocio maoy topscorer sa Prime Asia sa iyang 21 puntos. Si Eman Calo mitikdol og 12 puntos, samtang sila si Mercader ug John Abad nagkumboya og 17 puntos.
Ang Kia Motors gipangulohan ni Floyd Taboada pinaagi sa iyang 15 puntos, samtang sila si Vincent Menguito ug Axel Rabaya nagkumboya og 27 puntos. (BANAT NEWS)