CEBU, Philippines - Wa sila katilaw og daog sa miaging Philippine Cup, apan nalihian og daog ang Air21 Express dihang ilang gidemolis ang Barako Bull Energy, 97-88, sa ilang opener sa PBA Commissioner’s Cup kagabii didto sa Ynares Center.
Ang Air21 (kanhi Shopinas Clickers) nakahiagum sa labing ngil-ad nilang franchise performance sa miaging conference dihang mitapos sila sa torneyo dala ang 0-14 win-loss record.
Hinuon, mihayag ang paglaum sa Air21 ni coach Franz Pumaren nga makapakita og nindot nga labok as Commissioner’s Cup human sa ilang dominante nga kadaugan batok sa Barako Bull.
Sayung nakontrolar sa Air21 ang duwa diin milabaw sila og 20 puntos, 35-15, sa first period ug gikan didto wala na nila hatagi og kahigayunan ang Barakos nga makatilaw sa labaw.
Ang naturalized citizen ug Smart Gilas Pilipinas cager nga si Marcus Douthit kinsa maoy import sa Air21 mikulit og double-double nga 16 puntos ug 17 ka rebounds, apan ang forward nga si Nelbert Omolon ang nangulo sa koponan sa iyang 17 puntos.
Ngilngig ang gipakita sa ex-NBA cager ug import sa Barakos nga si DerMarr Johnson kinsa miposa og 35 puntos apan dili kini igo aron baswaton ang iyang koponan. - BANAT NEWS