Phil Younghusband, Caligdong gagawaran ng PSA ng Mr. Football title

MANILA, Philippines - Sina Phil Younghusband at Chieffy Caligdong ng Philippine Azkals ang ga­gawaran ng Philippine Sportswriters Asso­ciation (PSA) ng Mr. Football title para sa Annual Awards Night sa Marso 3 sa Manila Hotel.

Sina Younghusband at Caligdong ay mapapasama sa mga nauna nang binigyan ng naturang parangal na ipinagkaloob ng PSA kina Filipino football greats Ed Ocampo, Eddie Pacheco, Bert Honasan, Vic Sison at iba pa.

Makakasama sina Younghusband at Caligdong ng Philippine Azkals sa mga top sports achievers ng 2011.

“The PSA is pleased to name Phil Younghusband and Chieffy Caligdong as recipients of its Mr. Football title in its coming Annual Awards Night,” wika ni Rey Bancod ng Tempo, at pangulo ng pina­kamatandang media organization sa bansa na itinatag noong 1949.

Ang sportswriting fraternity, kinabibila­ngan ng mga editors at sportswriters mula sa iba’t ibang national broadsheets at tabloids, ang pumili kina boxing champ Nonito Donaire Jr. at pool king Dennis Orcollo bilang co-winners ng 2011 PSA Athlete of the Year award.

Si Vice-President Jejomar Binay ang tatayong guest of honor at keynote spea­ker sa nasabing okasyon na inihahandog rin ng Philippine Sports Commission (PSC), Philippine Amusements and Ga­ming Corporation (PAGCOR), Philippine Basketball Association (PBA), SM Prime Holdings, Milo, ICTSI, Harbour Centre, at Coca-Cola.

Sina Younghusband, isang striker mula sa Ashford Middlesex, England, at Caligdong, isang left striker buhat sa Pototan, Iloilo , ay napabilang sa national team noong 2004.

Sila ay miyembro ng Azkals team na tumalo sa Vietnam patungo sa semifinal stint sa ASEAN Suzuki Cup.

Ang 29-anyos na si Caligdong at ang 24-anyos na si Younghusband ang naging sandata rin ng Azkals sa main tournament ng AFC Challenge Cup at umabante sa second round ng World Cup qualifier.

Sila rin ang humataw ng dalawang goals sa panalo ng Azkals laban sa Mongolia sa Bacolod City para makalaro sa AFC group qualifying sa Myanmar.